03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Լրատվամիջոցները հայտնել են ՌԴ ռազմածովային ուժերի գլխավոր հրամանատարի փոփոխության մասին
Քաղաքականություն
11.03.2024 | 10:50
Ռուսաստանի ռազմածովային ուժերի գլխավոր հրամանատար, ծովակալ Նիկոլայ Եվմենովը պաշտոնանկ է արվել։ Այս մասին հայտնել են ռուսական «Ֆոնտանկա» և «Իզվեստիա» հրատարակությունները՝ հղում անելով սեփական իրազեկ աղբյուրներին։
Այս ԶԼՄ-ների տեղեկությունների համաձայն՝ Հյուսիսային նավատորմի հրամանատար Ալեքսանդր Մոիսեևը նշանակվել է ռազմածովային նավատորմի գլխավոր հրամանատարի ժամանակավոր պաշտոնակատար, փոխանցում է DW-ի ռուսական ծառայությունը։
Պաշտոնապես ՌԴ ՊՆ-ն կադրային փոփոխությունների մասին չի հայտնել։ Եվմենովին Մոիսեևով փոխելու մասին տեղեկությունը Ura.ru գործակալությանը հաստատել է Սևծովյան նավատորմի նախկին հրամանատար, պաշտոնաթող ծովակալ Վլադիմիր Կոմոյեդովը։ «Այո, դա հավաստի տեղեկություն է, ես գիտեմ դրա մասին, կարծում եմ՝ ավելի ուշ կհաղորդվի»,- գործակալության լրագրողի հետ զրույցում ասել է նա։
Նիկոլայ Եվմենովը նավատորմի զորքերը ղեկավարում է 2019 թվականի մայիսից։ Վերջին ամիսներին Ռուսաստանը կորցրել է Սևծովյան նավատորմի մի քանի ռազմանավ՝ Ուկրաինական ԱԹՍ-ների հարձակումների հետևանքով։ Ուկրաինայի Զինված ուժերի տվյալներով՝ մարտի 5-ին «Սերգեյ Կոտով» պարեկային կորվետի կորստից հետո ռուսական ռազմանավերը դադարեցրել են մարտական հերթապահությունը Սև ծովում։
