Քաղաքականություն
08.03.2024 | 11:25
Նիգերիայում զինված անձինք մարտի 7-ին 227 աշակերտ են առևանգել։ Reuters-ը հայտնում է, որ դեպքը տեղի է ունեցել Կադունա նահանգի Կուրիգա քաղաքում։ Նշվում է, որ գրոհայինները դպրոցի վրա հարձակվել են առավոտյան հանդիպումից հետո։ Ուսուցիչներից մեկի՝ Սանի Աբդուլլահի խոսքերով, միջնակարգ դպրոցից առևանգվածների թիվը 187 է, իսկ տարրական դպրոցից՝ մոտ 40։ Զինյալները սկզբում գերի են վերցրել տարրական դպրոցի 100 աշակերտի, բայց հետո ազատ են արձակել մի քանիսին, իսկ մյուսներին հաջողվել է փախչել:
Amnesty International-ը Նիգերիայի իշխանություններին կոչ է արել փրկել երեխաներին և պատասխանատվության ենթարկել մեղավորներին։ Նահանգի նահանգապետ Ուբա Սանին խոստացել է հասնել բոլոր դպրոցականների ազատ արձակմանը:
2014 թվականին «Բոկո Հարամ» ահաբեկչական խմբավորումը Նիգերիայի հյուսիսային Չիբոկ քաղաքում առևանգել էր 276 աշակերտուհիների։ 2021 թվականի դրությամբ նրանցից 100-ից ավելին անհայտ կորած է մնում։
Save the Children-ն ասում է, որ 2021 թվականի հունվարից օգոստոս ընկած ժամանակահատվածում Նիգերիայում առևանգվել է ավելի քան 1000 երեխա:
