14.12.2024 | 19:57
Ինչ իրավիճակ է ճանապարհներին 19։35-ի դրությամբ
Բաքվում ռուս-ադրբեջանական համագործակցության կարևոր փաստաթղթեր են ստորագրվել
Քաղաքականություն
06.03.2024 | 13:53
Ադրբեջանի և Ռուսաստանի կառավարությունների ղեկավարներ Ալի Ասադովի և Միխայիլ Միշուստինի՝ Բաքվում տեղի ունեցած բանակցություններից հետո երկու երկրների միջև ռազմավարական համագործակցության ոլորտում մի շարք կարևոր փաստաթղթեր են ստորագրվել, հաղորդում են ադրբեջանական լրատվամիջոցները։
Մասնավորապես, ստորագրվել են ռուս-ադրբեջանական սահմանային անցակետերի զարգացման գործողությունների ծրագիրը, «Յարագ-Կազմալյար-Սամուր» անցակետերի տարածքում Սամուր գետի վրայով ճանապարհային կամրջի շահագործման և պահպանման կարգի և դրան մոտեցումների վերաբերյալ միջկառավարական համաձայնագիրը, ՌԴ-ի և Ադրբեջանի միջև 2024-2026 թվականների զբոսաշրջության զարգացման ճանապարհային քարտեզը, երկու երկրների մշակույթի նախարարությունների միջև 2024-2026 թվականների համագործակցության ծրագիրը։
Միխայիլ Միշուստինը հայտարարել է, որ Մոսկվան և Բաքուն զարգացնում են երկաթուղային, ճանապարհային և ծովային ենթակառուցվածքները։ Այս առումով նա ընգդծել է, որ Մոսկվան առանձնահատուկ նշանակություն է տալիս Հարավային Կովկասում տնտեսական և տրանսպորտային կապերի ապաշրջափակմանն ու շահագրգռված է տարածաշրջանում խաղաղությամբ և կայունությամբ։
Հավելենք, որ այս տարի հունվարին Բաքվում ՌԴ փոխվարչապետ Ալեքսեյ Օվերչուկն ու Ադրբեջանի փոխվարչապետ Շահին Մուստաֆաևը ստորագրել էին «Ճանապարհային քարտեզ» ռուս-ադրբեջանական համագործակցության զարգացման հիմնական ուղղությունների վերաբերյալ։
2024-2026 թվականների «Ճանապարհային քարտեզը» նախատեսում է առևտրատնտեսական և ներդրումային համագործակցության զարգացմանն ուղղված կոնկրետ քայլերի իրականացում տրանսպորտի, արդյունաբերության, գյուղատնտեսության, պարենային անվտանգության, ինչպես նաև էներգետիկայի, զբոսաշրջության, հումանիտար և սոցիալական, ինչպես նաև նորարարության և տեղեկատվական տեխնոլոգիաների ոլորտներում։
