14.12.2025 | 21:40
Ոստիկանությունը ձերբակալել է Բրաունի համալսարանում կրակ բացելու մեջ կասկածվողին
Ուկրաինան ԱԹՍ-ների զանգվածային հարձակման է ենթարկվել
Քաղաքականություն
06.03.2024 | 11:51
Մարտի 6-ի գիշերը Ուկրաինայի զինված ուժերի ռազմաօդային ուժերը գրանցել են Ռուսաստանի կողմից Ուկրաինայում գրոհային անօդաչու թռչող սարքերի զանգվածային արձակում, գրում է DW-ի ռուսական ծառայությունը։
«ԱԹՍ Պոլտավայի մարզում՝ Միրգորոդի ուղղությամբ։ «Շահեդների» երկու խումբ՝ Խարկովի մարզի հյուսիս-արևմուտքում: «Շահեդներ» դեպի Խերսոնի շրջան՝ Նիկոլաևսկայայի ուղղությամբ։ Մի խումբ «շահեդներ»՝ Օդեսայի մարզում ուղղությունը դեպի Վիննիցա։ Սև ծովից անօդաչու թռչող սարքերի մի քանի նոր խմբեր մոտենում են Օդեսային»,- ասվում է կեսգիշերին մոտ հրապարակված Ուկրաինայի զինված ուժերի Telegram ալիքում։
Ուկրաինայի 15 շրջաններում օդային տագնապ է տրվել։ Տեղի իշխանություններն ու զինվորականները զեկուցել են Կիևի և Օդեսայի հակաօդային պաշտպանության աշխատանքի մասին։ Օդեսայի Suspilne հեռուստաալիքի թղթակիցները հայտնել են, որ քաղաքում երկու պայթյուն է լսվել։ Տեղական «Դումսկայա» առցանց հրատարակության տվյալներով՝ անօդաչու թռչող սարքի հարձակման հետևանքով հոսանքազրկվել է քաղաքի կենտրոնի մի մասը և Մոլդավանկա թաղամասը։ Սումի քաղաքում անօդաչու թռչող սարքի երեք հարված է գրանցվել տարբեր շրջաններում, հաղորդում է Սումիի մարզային ոստիկանությունը։
«Կան տուժածներ, նրանց ցուցաբերվում է բուժօգնություն, տեղում աշխատում են շտապօգնության ծառայությունները»,- հայտնել են տեղական իշխանությունները։ Լրատվամիջոցները գրել են նաև Խմելնիցկի շրջանում պայթյունների ձայների մասին։
Մարտի 2-ի գիշերը Ռուսաստանը ութ «Շահեդ» անօդաչու թռչող սարքերով հարձակում էր ձեռնարկել Օդեսայի վրա։ Դրանցից 7-ը խփվել էր հակաօդային պաշտպանության կողմից, մեկը հարվածել էր բազմահարկ շենքի։ Մահացել էր 12 մարդ, այդ թվում՝ հինգ երեխա։ Մարտի 3-ը քաղաքում սգո օր էր հայտարարվել։
