Թուրքական Դյորթյոլ տերմինալը դադարեցրել է ռուսական նավթի ընդունումը

Թուրքիայի Դյորթյոլ քաղաքում գտնվող նավթային տերմինալը կդադարեցնի բեռների ընդունումը Ռուսաստանի Դաշնությունից՝ ԱՄՆ-ի կողմից պատժամիջոցների մեծացման պատճառով։ Այս մասին հայտնել է Reuters-ը։

Global Terminal Services-ը (GTS), որը շահագործում է Դյորթյոլի տերմինալը, գործակալությանն ասել է, որ 2024 թվականի փետրվարի վերջին հաճախորդներին ծանուցել է, որ ընդհատում է ռուսական նավթի հետ կապված բոլոր գործողությունները և չի ընդունում բեռներ Ռուսաստանից, նույնիսկ եթե որևէ խախտում չլինի։

GTS-ն ընդգծել է, որ նոր սահմանափակումները լրացուցիչ միջոց են գործող պատժամիջոցներին, իսկ բոլոր նախորդ գործողություններն իրականացվել են սահմանափակող միջոցների լիարժեք համապատասխանությամբ, ներառյալ՝ վառելիքի գնի առաստաղի պահպանումը, որը սահմանվել է G7-ի երկրների կողմից:

Միևնույն ժամանակ, տերմինալը կշարունակի ընդունել ռուսական բեռները, որոնք հայտարագրվել էին մինչև փետրվարի վերջի արգելքի սահմանումը։ Վերջին ռուսական լցանավը Դյորթյոլի տերմինալ է ժամանել փետրվարի 19-ին՝ Բալթյան Պրիմորսկ նավահանգստից՝ մատակարարելով 511 հազար բարել դիզել, վկայում են Kpler վերլուծական ընկերության տվյալները։

Թուրքիան դարձել է ռուսական նավթի խոշորագույն ներկրողներից մեկը Ուկրաինայում պատերազմի սկզբից ի վեր։

Գործակալությունը նշում է, որ Ռուսաստանի հետ բիզնես վարող ընկերությունների դեմ պատժամիջոցներ կիրառելու՝ Վաշինգտոնի սպառնալիքը մեծ հարված կհասցնի թուրք-ռուսական էներգետիկ առևտրին։ Ըստ Kpler-ի տվյալների՝ վերջին երկու տարվա ընթացքում կտրուկ աճել են Ռուսաստանից Թուրքիա նավթի մատակարարումները։