Ադրբեջանն ու Պակիստանը ռազմական համագործակցության հարցեր են քննարկել

Ադրբեջանի պաշտպանության նախարարի առաջին տեղակալ, ԳՇ պետ Քերիմ Վելիևը Բաքվում հանդիպել է Պակիստանի զինված ուժերի պատվիրակության հետ՝ ԶՈՒ միացյալ շտաբի գլխավոր տնօրեն, գեներալ-լեյտենանտ Ահսան Գյուլրեզի գլխավորությամբ, գրում են ադրբեջանական լրատվամիջոցները։

«Հանդիպման ընթացքում Վելիևը նշել է, որ մեր երկրների միջև բարեկամական և եղբայրական հարաբերությունները, ինչպես նաև ադրբեջանա-պակիստանյան կապերն ու ռազմավարական գործընկերությունը զարգանում են վերընթաց ուղղությամբ»,- հայտնում է Ադրբեջանի ՊՆ-ն։

Նա ընդգծել է Ադրբեջանի, Պակիստանի և Թուրքիայի մասնակցությամբ եռակողմ համատեղ զորավարժությունների կարևորությունը և նշել նման զորավարժությունների կարևորությունը բանակների միջև փորձի փոխանակման և զինվորականների պրոֆեսիոնալիզմի հետագա կատարելագործման տեսանկյունից։

Գյուլրեզն էլ հայտնել է նման հանդիպումների և հարաբերությունների ընդլայնման անհրաժեշտությունը՝ Ադրբեջանի և Պակիստանի միջև հարաբերություններն է՛լ ավելի ամրապնդելու նպատակով։

Նշենք, որ նախօրեին տեղի էր ունեցել Ադրբեջանի և Պակիստանի միացյալ շտաբի ադրբեջանա-պակիստանյան աշխատանքային խմբի մակարդակով 10-րդ հանդիպումը։

Ավելի վաղ մամուլում տեղեկություններ էին տարածվել, որ Ադրբեջանի ռազմաօդային ուժերը և Պակիստանի ավիացիոն համալիրը պայմանագիր են կնքել, որը կդառնա ասիական երկրի պատմության մեջ ամենամեծ պայմանագիրը։ Ըստ դրա՝ Ադրբեջանը ձեռք է բերելու JF-17C Block-III կործանիչներ, ինչպես նաև ռեակտիվ ինքնաթիռների ուսումնական և մարտական ​​ զինամթերք։ Համաձայնագրի արժեքը գնահատվում է 1,6 մլրդ դոլար։ JF-17-ը համարվում է «4+» սերնդի կործանիչ, մարտական ​​ինքնաթիռն օգտագործում է հինգերորդ սերնդի ավիոնիկա և զենք:

Էմմա Չոբանյան