Մոսկվայի երկու բնակիչ է բերման ենթարկվել Նավալնիի հիշատակին ծաղիկներ դնելու համար

Մոսկվայում ոստիկանությունը բերման է ենթարկել Պոլինա Օրեխովային և Եգոր Կոմլևին՝ ընդդիմադիր քաղաքական գործիչ Ալեքսեյ Նավալնիի հիշատակին ծաղիկներ դնելու համար։ Այս մասին հայտնում է Current Time-ը։

Պոլինա Օրեխովային բերման են ենթարկել մարտի 5-ի առավոտյան, երբ նրա տուն են եկել անվտանգության ուժերը: Նա մեղադրվում է փետրվարի 17-ին «Վշտի պատի մոտ» զանգվածային միջոցառմանը մասնակցելու կանոնները խախտելու մեջ, որտեղ նա ծաղիկներ էր դրել։ Իրավապաշտպանների խոսքով՝ անվտանգության ուժերը վերցրել են նրա հեռախոսը և պատրաստվում են 48 ժամով կալանավորել։ Թե ինչի հիման վրա, դեռևս հայտնի չէ։

Երկրորդ ձերբակալվածը Եգոր Կոմլևն է, որը ծաղիկներ է խոնարհել ընդդիմադիր գործչի հիշատակին փետրվարի 16-ին և 17-ին, նաև մասնակցել նրա հուղարկավորությանը մարտի 1-ին։ Ոստիկանության աշխատակիցները հայտնել են, որ նրան հայտնաբերել են տեսախցիկների միջոցով: Կոմլևին բերման են ենթարկել մարտի 5-ի առավոտյան, երբ նա դուրս է եկել տանից, որից հետո նրան տարել են Խորոշևո-Մնևնիկի շրջանի ոստիկանության բաժին, լուսանկարել և խլել անձնագիրը։ Հայտնի չէ՝ ինչ հանցագործության համար է նա մեղադրվում։

Ընդդիմադիր քաղաքական գործիչ Ալեքսեյ Նավալնին մահացել է փետրվարի 16-ին Յամալո-Նենեց ինքնավար օկրուգի Խարպ գյուղում գտնվող «Բևեռային գայլերի» հատուկ ռեժիմի գաղութում։ Նրա մահվան եզրակացության մեջ նշվում է, որ քաղաքական գործչի մահվան պատճառները բնական են։ «Կոռուպցիայի դեմ պայքարի հիմնադրամի» ստեղծողի կողմնակիցները կարծում են, որ նրան սպանել են։ Բանտարկության ընթացքում Նավալնիին 27 անգամ պատժախուց են ուղարկել։

Ալեքսեյ Նավալնիի մարմինը մորն են հանձնել միայն փետրվարի 24-ին։ Մինչ այդ, մայրը բողոքել էր Քննչական կոմիտեի վերջնագրից, որը պահանջում էր համաձայնել Նավալնիին առանց հրապարակային հրաժեշտի, գաղտնի հուղարկավորություն իրականացնել։ Լյուդմիլա Նավալնայան հրաժարվել է կատարել այս պահանջը։ Նավալնիի հուղարկավորությունը տեղի է ունեցել մարտի 1-ին Մոսկվայում՝ Բորիսովյան գերեզմանատանը։ Չնայած կալանավորման սպառնալիքներին՝ հազարավոր մարդիկ են մասնակցել քաղաքական գործչի վերջին հրաժեշտի արարողությանը։ Հուղարկավորությունից մի քանի օր անց անգամ մարդիկ հերթ են կանգնում քաղաքական գործչի գերեզմանի մոտ ծաղիկներ դնելու համար։