04.04.2026 | 20:03
ՃՏՊ՝ հրդեհի բռնկմամբ
Բելգորոդում նավթի պահեստում պայթյուն է տեղի ունեցել․ հաղորդվում է ԱԹՍ-ի հարձակման մասին
Քաղաքականություն
05.03.2024 | 15:34
Բելգորոդի շրջանի Գուբկինսկի քաղաքային շրջանում պայթյուն է տեղի ունեցել ենթակառուցվածքային օբյեկտում, որին հաջորդել է հրդեհ։ Այս մասին հայտնել է նահանգապետ Վյաչեսլավ Գլադկովը, գրում է Meduza-ն։
Նրա խոսքով՝ «արտակարգ միջադեպը» տեղի է ունեցել մարտի 5-ի առավոտյան։ Զոհեր և վիրավորներ չկան։
«112» տելեգրամ ալիքը, որը կապված է Ռուսաստանի ուժայինների հետ, հայտարարել է, որ անօդաչու թռչող սարք է հարձակվել Դոլգոյե գյուղի Գուբկինսկի նավթի պահեստի վրա։ Փետրվարի 14-ին Գլադկովն արդեն հայտնել էր այս գյուղի «ենթակառուցվածքային օբյեկտի» վրա անօդաչու թռչող սարքի հարձակման մասին։ 112-ի տեղեկություններով՝ նավթի պահեստում այս պահին այրվում է մեկ պահուստարան։
Իշխանամերձ Mash տելեգրամ ալիքն էլ հրապարակել է հրդեհի տեսանյութը։ Նշվում է, որ խոսքը «Բելգորոդնեֆտեպրոդուկտ» նավթային պահեստի մասին է։ Աղբյուրը պնդում է, որ վառելիքի երեք պահուստարան է վառվում, իսկ նավթի պահեստի վրա գրոհած անօդաչու թռչող սարքը գործարկվել է Սումիի շրջանի Պուտիվլիի մերձակայքից։
ՌԴ ՊՆ-ն պաշտոնապես այս մասին տեղեկություններ չի հաղորդում։
Մարտ 5-ի առավոտյան մարզային արտակարգ իրավիճակների նախարարությունը հակիրճ հայտարարել էր երկու շրջանում հրթիռային վտանգի մասին։ ԱԻՆ-ից հայտնում են, որ վնասվել է պահուստարան, կրակի տարածման վտանգ չկա։
«Ուկրաինսկայա պրավդա»-ի ռազմական հետախուզության աղբյուրը հաստատել է Բելգորոդի շրջանում նավթի պահեստի վրա հարձակումը՝ այն անվանելով Ուկրաինայի ՊՆ հետախուզության գլխավոր վարչության գործողություն։ Սակայն պաշտոնապես Կիևն այս մասին տեղեկություններ չի հաղորդում։
