24.06.2026 | 15:44
Փաշինյանն ու Մոդին կարևորել են բարձր մակարդակի փոխայցելությունների կազմակերպումը
43 երկիր պահանջում է հետաքննել Նավալնիի մահվան հանգամանքները
Քաղաքականություն
05.03.2024 | 14:00
43 պետություններ պահանջում են անկախ միջազգային հետաքննություն անցկացնել ռուս ընդդիմադիր գործիչ Ալեքսեյ Նավալնիի մահվան կապակցությամբ։ Նավալնին մահացել է կալանքի տակ՝ Հյուսիսային Խարպ գյուղի հատուկ ռեժիմի գաղութում։ Նրա համախոհները կարծում են, որ նա սպանվել է: 43 երկրի անունից անկախ հետաքննության անհրաժեշտության մասին մարտի 4-ին հայտարարել է ՄԱԿ-ում Եվրամիության պատվիրակության ղեկավար Լոտտե Կնուդսենը, գրում է VOA-ն։
Նա նշել է, որ այս երկրների կարծիքով, քաղաքական գործչի մահվան վերջնական պատասխանատվությունն անձամբ կրում է Ռուսաստանի նախագահ Վլադիմիր Պուտինը։
««Մենք վրդովված ենք ռուս ընդդիմադիր քաղաքական գործիչ Ալեքսեյ Նավալնիի մահվան փաստից, որի պատասխանատվությունը, ի վերջո, կրում են (Ռուսաստանի) նախագահ Պուտինը և Ռուսաստանի իշխանությունները», – ասել է Կնուդսենը։ «Ռուսաստանը պետք է թույլ տա, որ անկախ և թափանցիկ միջազգային հետաքննություն անցկացվի նրա (Նավալնիի) հանկարծակի մահվան հանգամանքների վերաբերյալ»:
Այս հայտարարությունը ստորագրած երկրների թվում են ԵՄ 27 անդամ երկրները, ինչպես նաև 16 այլ երկրներ, այդ թվում ԱՄՆ-ը, Մեծ Բրիտանիան, Ուկրաինան, Ավստրալիան, Կանադան, Նոր Զելանդիան և Նորվեգիան:
Հայաստանն այս ցուցակում չկա։ Հայտարարության տակ ստորագրած երկրների թվում չեն նաև Վրաստանը, Մոլդովան, Ադրբեջանն ու Թուրքիան։
