Սալեխարդի դատարանը մերժել է Նավալնիի մոր բողոքը

Սալեխարդի դատարանը քննիչների անգործության վերաբերյալ Լյուդմիլա Նավալնայայի բողոքը թողել է առանց քննարկման, Telegram-ի իր ալիքում հայտնել է «Կոռուպցիայի դեմ պայքարի հիմնադրամի» տնօրեն Իվան Ժդանովը, փոխանցում է DW-ի ռուսական ծառայությունը։

Ալեքսեյ Նավալնիի դաշնակիցն ընդգծել է, որ այս բողոքն ուղարկել է ընդդիմադիր քաղաքական գործչի մայրը, քանի որ ուժայինները մի քանի օր հրաժարվել են քաղաքական գործչի մարմինը հանձնել հարազատներին։

Նավալնիի մահվան գործով նախաքննական հետաքննությունը շարունակվում է։

«Հասկանալի է, որ այս ստուգումը ոչնչով չի ավարտվի, բայց փաստաբանները բոլոր ֆորմալ ընթացակարգերը կտանեն մինչ ամբողջությամբ հրաժարվեն քրեական գործ հարուցելուց և կբողոքարկեն այդ մերժումը։ Իսկ իրական քննությունը վաղ թե ուշ կիրականացվի»,- գրել է Ժդանովը։

Ընդդիմադիր քաղաքական գործիչ Ալեքսեյ Նավալնին մահացել է փետրվարի 16-ին Յամալո-Նենեց ինքնավար օկրուգի Խարպ գյուղում գտնվող «Բևեռային գայլերի» հատուկ ռեժիմի գաղութում։ Նրա մահվան մասին եզրակացության մեջ նշվում է, որ քաղաքական գործիչը մահացել է բնական մահով։ «Կոռուպցիայի դեմ պայքարի հիմնադրամի» ստեղծողի կողմնակիցները կարծում են, որ նրան սպանել են։ Բանտարկության մեջ գտնված ժամանակում Նավալնիին 27 անգամ պատժախուց են ուղարկել։

Ալեքսեյ Նավալնիի մարմինը մորն են հանձնել միայն փետրվարի 24-ին։ Մինչ այդ, մայրը բողոքել էր Քննչական կոմիտեի վերջնագրից, որը պահանջում էր համաձայնել Նավալնիին առանց հրապարակային հրաժեշտի, գաղտնի հուղարկավորություն իրականացնել։ Լյուդմիլա Նավալնայան հրաժարվել է կատարել այս պահանջը։

Նավալնիի հուղարկավորությունը տեղի է ունեցել մարտի 1-ին Մոսկվայում՝ Բորիսովյան գերեզմանատանը։ Չնայած կալանավորման սպառնալիքներին՝ հազարավոր մարդիկ եկել էին հրաժեշտ տալու քաղաքական գործչին։

Հուղարկավորությունից մի քանի օր անց մարդիկ հերթ են կանգնում քաղաքական գործչի գերեզմանի մոտ ծաղիկներ դնելու և նրան հրաժեշտ տալու համար։