Նիկի Հեյլին փրայմերիզում առաջին անգամ հաղթել է Թրամփին

Դոնալդ Թրամփի գլխավոր մրցակից Նիկի Հեյլին առաջին հաղթանակն է տարել Կոլումբիայի շրջանի նախագահական փրայմերիզում (ներկուսակացական ընտրություններում), հայտնում է The New York Times-ը։

Associated Press-ի տվյալներով՝ Հեյլին ստացել է ձայների 62,8 տոկոսը, Թրամփին աջակցել է փրայմերիզի մասնակիցների 33,3 տոկոսը։ Մնացած ձայները բաշխվել են Ֆլորիդայից գործարարի և ԱՄՆ ռազմաօդային ուժերի պաշտոնաթող մայոր Դեյվիդ Ստուկենբերգի միջև։

Մինչ այս, Նիկի Հեյլին հանրապետականների փրայմերիզում հաղթել էր միայն Նևադայում։ Մինչ Կոլումբիայում նախնական ընտրությունները՝ Դոնալդ Թրամփն ուներ 244 պատվիրակների ձայն, իսկ Նիկի Հեյլին՝ 24: Այժմ նա կստանա բոլոր 19 պատվիրակների ձայները:

Նիկի Հեյլիի մամուլի քարտուղար Օլիվիա Պերես-Կուբասն ասել է. «Զարմանալի չէ, որ հանրապետականները, ովքեր ամենամոտն են տեսնում Վաշինգտոնի խնդիրները, մերժում են Դոնալդ Թրամփին և նրա բերած քաոսը»:

Մինչ այդ, Դոնալդ Թրամփն արդեն հաղթել է փրայմերիզում յոթ նահանգներում և ԱՄՆ մեկ կղզի տարածքում, ներառյալ՝ Հարավային Կարոլինան, որտեղ Հեյլին նահանգապետ էր 2011-ից 2017 թվականներին:

Մարտի 2-ին Թրամփը հաղթել է Այդահոյում, Միչիգանում և Միսսուրիում։ Ըստ Associated Press-ի՝ ԱՄՆ նախկին նախագահը, ամենայն հավանականությամբ, կհավաքի մի քանի հարյուր ավելի ձայն մարտի 5-ին կայանալիք «սուպեր երեքշաբթիի» ժամանակ: Այս օրը հանրապետականները փրայմերիզ կանցկացնեն 15 նահանգներում և ԱՄՆ մեկ կղզի տարածքում։ Թեկնածուները կպայքարեն միանգամից 874 պատվիրակների ձայնի համար։