«Զանգեզուրի միջանցք»-ը կարող է խաղաղություն հաստատելու գործիք դառնալ․ Ալիևի ներկայացուցիչ

Զանգեզուրի միջանցքը կարող է դառնալ Հայաստանի և Ադրբեջանի միջև վստահության և խաղաղության ամրապնդման կարևոր միջոց։ Այս մասին Անթալիայի դիվանագիտական ​​ֆորումի պանելային քննարկման ժամանակ ասել է Ադրբեջանի նախագահի հատուկ հանձնարարությունների գծով ներկայացուցիչ, դեսպան Էլչին Ամիրբեկովը․ փոխանցում է Report-ը։

Ելույթ ունենալով «Եվրասիայում համագործակցության նոր դինամիկան» թեմայով նիստում՝ նա ընդգծել է, որ զուտ տնտեսական օգուտներից բացի, հետկոնֆլիկտային միջավայրում երկրների միջև տրանսպորտային կապի վերականգնումը կարող է նաև կարևոր դեր խաղալ վստահության ձևավորման գործում և դառնալ արդյունավետ գործիք՝ խաղաղություն հաստատելու համար։

«Դրա վառ օրինակն է Զանգեզուրի միջանցքի նախագիծը, որը կարող է ոչ միայն ուղիղ տրանսպորտային կապ հաստատել Հայաստանի և Ադրբեջանի միջև, այլև վերջ դնել տարածաշրջանում Հայաստանի տնտեսական մեկուսացմանը։ Բացի այդ, այս նախագծի իրականացումն օգուտ կբերի և լիովին կբավարարի տարածաշրջանի այլ երկրների՝ առաջին հերթին Թուրքիայի, Ռուսաստանի և Իրանի շահերը։

Զանգեզուրի միջանցքը կարող է նաև այլընտրանքային ճանապարհ դառնալ արդեն գոյություն ունեցող Անդրկասպյան միջազգային միջին միջանցքին, որը Չինաստանը կապում է Եվրոպայի հետ Կենտրոնական Ասիայի և Հարավային Կովկասի միջոցով` Ադրբեջանի և Վրաստանի տարածքով»,- ընդգծել է Ալիևի ներկայացուցիչը։

«Հուսով ենք, որ Երևանը, որն ավելի քան երեք տարի խուսափել է իր պարտավորությունների կատարումից և փաստացի խոչընդոտել է Զանգեզուրով տրանսպորտային կապի վերականգնումը, վերջապես կգիտակցի այս ծրագրի ողջ օգուտը Հայաստանի համար։ Հակառակ դեպքում, բաղձալի «խաչմերուկը» կարող է մնալ որպես տարածաշրջանային փակուղի»,- նշել է Ամիրբեկովը։