Քաղաքականություն
01.03.2024 | 12:07
ԱՄՆ Պետքարտուղարության խոսնակ Մեթյու Միլլերը ճեպազրույցում անդրադարձել է ՌԴ նախագահ Վլադիմիր Պուտինի՝ միջուկային պատերազմի մասին հայտարարություններին։ Պատասխանելով հարցին, թե ինչպիսին է Պետքարտուղարության արձագանքը Պուտինի ելույթին, Արևմուտքի դեմ նրա հնչեցրած մեղադրանքներին ու միջուկային սպառնալիքին, Միլլերը նշել է, որ դա «անպատասխանատու հռետորաբանություն է»։
«Առաջին անգամ չէ, որ մենք տեսնում ենք Վլադիմիր Պուտինի անպատասխանատու հռետորաբանությունը: Պետության ղեկավարը, որն ունի միջուկային զենք, չի կարող այդպես խոսել։ Նախկինում մասնավոր և անմիջականորեն շփվել ենք Ռուսաստանի հետ միջուկային զենքի կիրառման հետևանքների մասին։ Ամեն դեպքում, մենք որևէ նշան չունենք, որ Ռուսաստանը պատրաստվում է միջուկային զենք կիրառել, և կշարունակենք ուշադիր հետևել»,- հայտարարել է Միլլերը։
