Նավալնիի կողմնակիցներին կոչ են արել կատարել ընդդիմադիր գործչի վերջին կամքը․ պայքարը շարունակվելու է

Ալեքսեյ Նավալնիի կողմնակիցներին կոչ են արել ՌԴ նախագահական ընտրությունների օրը՝ մարտի 17-ի կեսօրին գնալ ընտրատեղամասեր՝ այդպիսով կատարելով բանտում մահացած ընդդիմադրի «վերջին կամքը»։

«Մենք ուղիղ քաղաքական կտակ ունենք Ալեքսեյ Նավալնիից. «Կեսօրին՝ ընդդեմ Պուտինի»,- իր տեսաուղերձում ասել է Նավալնիի դաշնակից Լեոնիդ Վոլկովը՝ ցուցադրելով Նավալնիի փետրվարի 1-ի գրառման սքրինշոթը, փոխանցում է DW-ի ռուսական ծառայությունը։

Նրա խոսքով՝ «սա Նավալնիի վերջին քաղաքական հրապարակումն է, վերջին բանը, որ նա փոխանցել է»։

«Սա հիմա սոսկ ինչ-որ քաղաքական ակցիա չէ՝ ուղղված մենակության, մեկուսացման հաղթահարմանը, սա նաև սգո ցույց է, քաղաքացիական հոգեհանգստի արարողություն, եթե կուզեք՝ սա ակցիա է Ալեքսեյ Նավալնիի հիշատակին։ Սա ակցիա է, որն Ալեքսեյ Նավալնին մեզ խնդրել է իրականացնել»,- ընդգծել է Վոլկովը։

Նա նաև ասել է, որ ակցիայի հիմնական իմաստը մարտի 17-ին՝ ժամը 12-ին «գալ ու միմյանց նայել»՝ կատարելով Նավալնիի «վերջին կամքը», կարևոր չէ՝ ինչ անել ընտրատեղամասերում՝ փչացնել քվեաթերթիկները կամ քվեարկել թեկնածուներից որևէ մեկի օգտին։

Խոսելով այն մասին, թե ինչ է լինելու Ռուսաստանում ընտրություններից հետո՝ Լեոնիդ Վոլկովը խոստացել է, որ ընդդիմադիրների քաղաքական պայքարը կշարունակվի «մինչև պուտինյան ռեժիմի մահը»։

«Մարտի 17-ից հետո կլինեն նոր քաղաքական նախագծեր, կլինեն նոր գաղափարներ, այնպիսիք, որոնցով մենք ինքներս պետք է հանդես գանք՝ առանց Ալեքսեյի, բայց նրա սկզբունքներով, նրա պատգամով։ Մտածել անսովոր նախագծեր, այնպիսիները, որոնք ռեժիմին ցավ կպատճառեն, նրան կհասցնեն հարվածը հարվածի հետևից, քանի դեռ այն վերջնականապես չի փլուզվել»,- ասել է Վոլկովը։

Փետրվարի 1-ին սոցցանցերում արված վերջին հրապարակած գրառման մեջ Ալեքսեյ Նավալնին իրեն աջակցողներին կոչ էր արել մարտի 17-ի ուղիղ կեսօրին գնալ ընտրատեղամասեր՝ դա անվանելով «իսկական համառուսական բողոքի ակցիա», որը «լիովին օրինական է և ապահով»։