22.07.2026 | 23:29
СHP-ի նկատմամբ ճնշումների ֆոնին՝ Թուրքիայի ընդդիմության առաջնորդը հայտնել է նոր կուսակցություն ստեղծելու մասին
Հունգարիայի խորհրդարանը հավանություն է տվել ՆԱՏՕ-ին Շվեդիայի անդամակցությանը
Քաղաքականություն
27.02.2024 | 12:42
Հունգարիայի խորհրդարանը հավանություն է տվել ՆԱՏՕ-ին Շվեդիայի անդամակցության հայտին՝ այդպիսով վերացնելով Հյուսիսատլանտյան դաշինքին երկրի անդամակցության վերջին խոչընդոտը, գրում է BBC-ի ռուսական ծառայությունը։
Հունգարիան դարձել է ՆԱՏՕ-ի 31 երկրներից վերջինը, որը հավանություն է տվել Շվեդիայի հայտին։ Հունվարին Թուրքիայի խորհրդարանը՝ մեկ այլ երկիր, որը երկար ժամանակ հետաձգում էր այս հարցով քվեարկությունը, իր համաձայնությունը տվեց դաշինքին Ստոկհոլմի միանալուն։
Հունգարիայի խորհրդարանի 188 պատգամավոր քվեարկել է Շվեդիայի դիմումի վավերացման օգտին, վեցը՝ դեմ։ Քվեարկությունից հետո Շվեդիայի վարչապետ Ուլֆ Քրիստերսոնն այն անվանել է պատմական օր իր երկրի համար։
«Այսօր պատմական օր է։ Այժմ ՆԱՏՕ-ի բոլոր երկրների խորհրդարանները քվեարկել են Շվեդիայի՝ ՆԱՏՕ-ին անդամակցելու օգտին։ Շվեդիան պատրաստ է ձեռք մեկնել եվրատլանտյան անվտանգության ապահովման գործում»,- գրել է Քրիստերսոնը X-ի իր էջում։
Հիշեցնենք՝ Շվեդիան, որը երկու հարյուր տարի չի միացել ռազմական դաշինքների, Ֆինլանդիայի հետ միասին ՆԱՏՕ-ին անդամակցելու հայտ է ներկայացրել 2022 թվականին՝ Ուկրաինայի դեմ ռուսական լայնածավալ ագրեսիայի սկսվելուց հետո։
