ԱՄՆ-ն ու Գերմանիան իսկապես ՌԴ-ի հետ քննարկել են Նավալնիի փոխանակումը․ Reuters

Ռուս ընդդիմադիր գործիչ Ալեքսեյ Նավալնին, որը մահացավ բանտում, կարող էր ազատ արձակվել բանտարկյալների փոխանակման արդյունքում, գրում է Reuters-ը։

Լրատվամիջոցը մեջբերում է Նավալնիի աջակից Մարիա Պևչիխի՝ նախօրեին արված հայտարարությունները, որ քաղաքական գործիչը մոտ է եղել ազատ արձակմանը բանտարկյալների փոխանակման արդյունքում։ Արևմտյան պաշտոնյաներից մեկը Reuters-ին ասել է, որ Նավալնիի փոխանակման պաշտոնական առաջարկ չի եղել, սակայն նշել է, որ նախնական բանակցություններ ընթացել են Ռուսաստանի, ԱՄՆ-ի և Գերմանիայի միջև:

Ռուսական երկու աղբյուրներ էլ Reuters-ին հայտնել են, որ Նավալնիի փոխանակման շուրջ բանակցություններն արդեն ընթացել են, և փոխանակումը սկզբունքորեն համաձայնեցված է եղել։

Քննարկումների մասին տեղյակ ռուսաստանյան աղբյուրներից մեկը լրատվամիջոցին պատմել է, որ փոխանակումը նախատեսված է եղել փետրվարի կեսերին, և որ Նավալնին ու նրա կինը համաձայնել են դրան:

Աղբյուրը նաև հայտնել է, որ գործարար Ռոման Աբրամովիչը մասնակցել է բանակցություններին, ինչպես ավելի վաղ պնդում էր Պևչիխը։

«Ի սկզբանե պլանը նախատեսում էր փոխանակում միայն ամերիկացի լրագրող Գերշկովիչի հետ, և Աբրամովիչը դա քննարկել է Պուտինի հետ: Միակ մարդը, ում հետ Պուտինը պատրաստ էր նրան փոխանակել, Կրասիկովն էր, բայց գերմանացիները կտրականապես դեմ էին, քանի որ դա ամերիկյան խնդիր էր: Երբ Նավալնին հայտնվել է այս պլանի շրջանակում, գերմանացիները, ի վերջո, համաձայնել են»,- ասել է աղբյուրը՝ նշելով, որ ամեն ինչ վերջնականապես հաստատվել է, երբ Գերմանիայի կանցլեր Օլաֆ Շոլցը գնացել է ԱՄՆ, որտեղ արդեն քննարկվել են մանրամասները, թե երբ և որտեղ է տեղի ունենալու փոխանակումը։

Կրեմլին մոտ կանգնած աղբյուրն էլ հայտնել է, որ Ռուսաստանն ու Արևմուտքը սկզբունքորեն պայմանավորվել են Նավալնիի և Գերշկովիչի փոխանակման շուրջ, սակայն գործարքի ստույգ մանրամասները դեռ չէին մշակվել։