Մակրոնը չի բացառել Ուկրաինա արևմտյան զորքեր ուղարկելը

Ֆրանսիայի նախագահ Էմանուել Մակրոնը Փարիզում եվրոպացի առաջնորդների հանդիպումից հետո հայտարարել է Ուկրաինային աջակցելու նոր քայլերի մասին և ասել, որ պատերազմում Ռուսաստանի նկատմամբ հաղթանակի հասնելու համար չի կարելի բացառել արևմտյան ցամաքային ուժերը երկիր ուղարկելը, գրում է BBC-ի ռուսական ծառայությունը։

«Այսօր ցամաքային զորքեր ուղարկելու շուրջ կոնսենսուս չկա, բայց ոչինչ բացառել չի կարելի։ Մենք կանենք հնարավոր ամեն ինչ, որպեսզի Ռուսաստանը չհաղթի այս պատերազմում»,- Մակրոնի խոսքերն է մեջբերում AFP-ն։ «Մենք համոզված ենք, որ Ռուսաստանի պարտությունն անհրաժեշտ է Եվրոպայում անվտանգության և կայունության համար»:

Մակրոնը նաև հայտարարել է նոր կոալիցիայի ստեղծման մասին, որը Ուկրաինային կտրամադրի հեռահար հրթիռներ և զինամթերք։ Թե ինչ սպառազինության մասին է խոսքը՝ կոնկրետ չեն նշվում։ Ռուսաստանը, նրա խոսքով, գնալով ավելի ագրեսիվ է դառնում ոչ միայն Ուկրաինայի մարտի դաշտում, այլեւ ընդհանրապես։ Ելիսեյան պալատում համաժողովը բացելով՝ Մակրոնն ասել է, որ Ուկրաինայի դաշնակիցները պետք է ուժեղացնեն Ուկրաինային աջակցությունը։

«Մենք տեսնում ենք Ռուսաստանի կողմից խստացում  հատկապես վերջին մի քանի ամիսների ընթացքում»,- ասել է Մակրոնը՝ հավելելով, որ Արևմուտքը պետք է փոխի իր մոտեցումը և հաշվի առնի «ռազմական և ռազմավարական տեսանկյունից սպառնալիքի վերափոխումը»։
Ելիսեյան պալատում համաժողովին մասնակցել են Գերմանիայի կանցլեր Օլաֆ Շոլցը, Մեծ Բրիտանիայի արտաքին գործերի նախարար Դեյվիդ Քեմերոնը, Իսպանիայի վարչապետ Պեդրո Սանչեսը, Նիդերլանդների վարչապետ Մարկ Ռյուտեն, ինչպես նաև սկանդինավյան և բալթյան երկրների ղեկավարներ։ Միացյալ Նահանգները ներկայացնում էր պետքարտուղարի Եվրոպայի և Եվրասիայի հարցերով օգնական Ջիմ Օ՛Բրայենը, իսկ Կանադան՝ պաշտպանության նախարար Բիլ Բլերը։
Էմանուել Մակրոնի խոսքով՝ նոր կոալիցիայի կազմում նախատեսվում է Կիևին միջին և մեծ հեռահարության հրթիռներ մատակարարել։
Նա նաև մեկնաբանել է Ուկրաինային ֆրանսիական Mirage կործանիչների հնարավոր մատակարարման մասին մամուլի հրապարակումները և ասել, որ Փարիզն այս հարցի շուրջ ներկայումս չի բանակցում։

Միևնույն ժամանակ, Գերմանիայի կանցլեր Օլաֆ Շոլցը կրկին դեմ է արտահայտվել Ուկրաինային Taurus թևավոր հրթիռներ ուղարկելուն։
Գերմանիայի ղեկավարի խոսքով՝ Կիևին գերճշգրիտ զենք մատակարարելը հղի է պատերազմի սրմամբ՝ հաշվի առնելով այդ հրթիռների՝ ռուսական տարածք հասնելու հնարավորությունը։