07.10.2026 | 15:00
Հայտարարվել են քիմիայի ոլորտում Նոբելյան մրցանակի դափնեկիրները
Գերմանիայի իշխանությունները հրաժարվել են մեկնաբանել Նավալնիի փոխանակման նախապատրաստման մասին պնդումները
Քաղաքականություն
26.02.2024 | 19:35
Գերմանիայի կառավարությունը ներկայում չի կարող մեկնաբանել Ալեքսեյ Նավալնիի գործընկերների՝ քաղաքական գործչի մահից առաջ նրա փոխանակման նախապատրաստման մասին հայտարարությունները։ Բեռլինում կայացած մամուլի ասուլիսում այս մասին ասել է գերմանական կաբինետի ներկայացուցիչը, գրում է BBC-ի ռուսական ծառայությունը։
Այսօր ավելի վաղ Նավալնիի համախոհները հայտնել էին, որ մինչ ընդդիմադիրի մահը գրեթե լուծված է եղել Գերմանիայում ցմահ ազատազրկման դատապարտված մարդասպան Վադիմ Կրասիկովի հետ փոխանակման հարցը։ Կրասիկովը համարվում է հատուկ ծառայությունների աշխատակից, նա սպանել է Չեչնիայի նախկին դաշտային հրամանատարին, ՌԴ նախագահ Վլադիմիր Պուտինը նրա մասին խոսել է որպես «հայրենասեր» (առանց անունով կոչելու):
Հիշեցնենք՝ Ռուսաստանի Յամալո-Նենեց ինքնավար շրջանի դաշնային քրեակատարողական ծառայությունը փետրվարի 16-ին հայտարարեց Նավալնիի մահվան մասին։ Գերատեսչության տվյալներով՝ քաղաքական գործիչը «զբոսանքից հետո իրեն վատ է զգացել՝ գրեթե անմիջապես կորցնելով գիտակցությունը»։ Վերակենդանացման միջոցառումները արդյունք չեն տվել։ Ալեքսեյ Նավալնիի մահից հետո անհայտ էր դիակի գտնվելու վայրը։
Միայն մեկ շաբաթ անց է Լյուդմիլա Նավալնայան կարողացել տեսնել որդու մարմինը։ Քննիչները քաղաքական գործչի մորն ասել են, որ մարմինը չեն հանձնի երկու շաբաթ, քանի որ այն, իբր, ուղարկվել է քիմիական փորձաքննության։ Նավալնայան բողոք է ներկայացրել Քննչական կոմիտեի գործողությունների դեմ, իսկ արտերկրում գտնվող տասնյակ հայտնի ռուս հասարակական գործիչներ հանդես են եկել քաղաքական գործչի մարմինը մորը վերադարձնելու պահանջով։ Ի վերջո, փետրվարի 24-ին Նավալնիի մարմինը հանձնվել է մորը։
«Հուղարկավորությունը դեռ առջևում է: Մենք չգիտենք՝ արդյո՞ք իշխանությունները կխոչընդոտեն, որ այն անցկացվի այնպես, ինչպես ընտանիքն է ցանկանում և ինչպես արժանի է Ալեքսեյը: Մենք տեղեկությունը կհայտնենք, երբ այն հասանելի լինի»,- ասել է քաղաքական գործչի մամուլի քարտուղար Կիրա Յարմիշը:
