16.01.2025 | 20:13
Մեծ Բրիտանիան և Ուկրաինան 100-ամյա գործընկերության համաձայնագիր են ստորագրել
ՌԴ-ն շարունակում է շփումները ՀՀ-ի հետ՝ ՀԱՊԿ-ի մասով Փաշինյանի խոսքերը պարզաբանելու համար․ Պեսկով
Քաղաքականություն
26.02.2024 | 15:09
Մոսկվան շարունակում է շփումները Երևանի հետ՝ պարզաբանելու Հայաստանի վարչապետ Նիկոլ Փաշինյանի հայտարարությունները ՀԱՊԿ-ին մասնակցության «սառեցման» մասին։ Այս մասին ճեպազրույցում հայտարարել է ՌԴ նախագահի մամուլի քարտուղար Դմիտրի Պեսկովը, գրում է ՏԱՍՍ-ը։
«Եթե ելնենք համապատասխան փաստաթղթերի տեքստից, ապա նման ռեժիմ պարզապես դե յուրե գոյություն չունի։ Բավականին հաճախակի շփումներ ունենք մեր հայ գործընկերների հետ, իհարկե, դա կպարզենք, կշփվենք, կիմանանք»,- ասել է Պեսկովը։
Հիշեցնենք՝ ՀՀ վարչապետ Նիկոլ Փաշինյանը France 24-ին տված հարցազրույցում հայտարարել էր, որ ՀԱՊԿ-ն իր պատկանությունները ՀՀ-ի նկատմամբ չի կատարել։
«Գիտեք՝ Հավաքական անվտանգության պայմանագրի կազմակերպությունը, մեր գնահատմամբ, չի կատարել անվտանգային ոլորտի իր պարտավորությունները Հայաստանի Հանրապետության նկատմամբ: Մասնավորապես, 2021 թվականին, 2022 թվականին, և դա էլ չէր կարող մեզ համար անցնել առանց հետևանքների: Եվ հետևանքը գործնականում այն է, որ, ըստ էության, սառեցրել ենք մեր մասնակցությունը Հավաքական անվտանգության պայմանագրի կազմակերպությունում: Վաղը ի՞նչ կլինի՝ վաղը կերևա»,- ասել էր Նիկոլ Փաշինյանը։
