Քաղաքականություն
26.02.2024 | 14:07
Գերմանիայի արտաքին գործերի նախարար Աննալենա Բերբոքը ստիպված է եղել փոխել Նիկոլաև այցի ծրագիրը, քանի որ ռուսական անօդաչու թռչող սարքն ինչ-որ պահի սկսել է հետևել նրա ավտոշարասյանը, հայտնել է DW-ի ռուսական ծառայությունը։
Bild-ի թղթակից Նադյա Ասվադը, որն ուղեկցում էր Բերբոքին ճամփորդության ժամանակ, հայտնել է, որ ավտոշարասյունը Գերմանիայի արտգործնախարարի հետ ուղևորվում էր Սև ծովի ափ՝ այցելելու աղազերծման կայան, որը գտնվում է ճակատային գծից 50 կմ հեռավորության վրա:
«Կայարան տանող ճանապարհին ռուսական հետախուզական անօդաչու թռչող սարքը մոտեցել է մեքենաների շարասյունին: Սովորաբար դրա հայտնվելուն հետևում է օդային հարձակում»,- հաղորդում է Bild-ը Telegram-ի իր ալիքում:
Պատվիրակության ուկրաինացի անդամների սմարթֆոններին ահազանգ է ստացվել, վարորդները փորձել են հեռանալ ԱԹՍ-ից, բայց այն շարունակել է թռչել շարասյան հետևից՝ հետապնդելով նրանց։ Արդյունքում նրանց հաջողվել է դուրս գալ հետապնդման գոտուց, ԱԹՍ-ն հեռացել է:
ZDF-ի լրագրողներն էլ հավելում են, որ Գերմանիայի ԱԳՆ-ն հաստատել է Բերբոքի այցի ծրագրում փոփոխությունը։ Միջադեպից հետո գերմանական պատվիրակության անդամներին խնդրել են նստել զրահամեքենաներ։ Մի քանի ժամ անց արտգործնախարարի ավտոշարասյունն արդեն հատել է Մոլդովայի հետ սահմանը։
