12.08.2026 | 10:55
Պուտինն ազատ է արձակել ամերիկացի նախկին ծովային հետևակային Ռոբերտ Գիլմանին
Իսրայելի պաշտպանության բանակը Նեթանյահուի կաբինետին է ներկայացրել Ռաֆահի գործողության ծրագիրը
Քաղաքականություն
26.02.2024 | 12:53
Իսրայելի պաշտպանության բանակը (IDF) երկրի ռազմական կաբինետին է ներկայացրել Գազայի հատվածի հարավում գտնվող Ռաֆահ քաղաքում ցամաքային գործողության, ինչպես նաև մարտական գոտուց խաղաղ բնակչության տարհանման ծրագիր։ Այս մասին հայտնել են Իսրայելի վարչապետ Բենիամին Նեթանյահուի գրասենյակից, գրում է DW-ի ռուսական ծառայությունը։
Ըստ AFP-ի՝ հայտարարությունն արվել է Ռաֆահում Իսրայելի պաշտպանության բանակի ցամաքային գործողության ակնկալվող մեկնարկից առաջ։ Նեթանյահուն այս քաղաքն անվանում է ՀԱՄԱՍ արմատական իսլամիստական խմբավորման «վերջին բաստիոնը», որը 2023 թվականի հոկտեմբերի 7-ին լայնածավալ հարձակում է իրականացրել Իսրայելի վրա։
Չնայած հրադադարի շուրջ ընթացող բանակցություններին՝ Իսրայելի վարչապետը մտադիր է առանց հապաղելու հաստատել Ռաֆահում հարձակողական գործողության պլանը, գրում է dpa-ը։
Ինքը՝ Նեթանյահուն, հայտարարել է, որ ցանկանում է այս շաբաթվա սկզբին կաբինետի նիստ գումարել՝ ծրագիրը հաստատելու համար։
Ռաֆահը գտնվում է Եգիպտոսի հետ Գազայի հատվածի սահմանին։ Գազայի հատվածում Իսրայելի ռազմական գործողության մեկնարկից ի վեր քաղաքն ընդունել է ավելի քան մեկ միլիոն փախստականի։ Հաշվի առնելով այս հանգամանքը՝ Իսրայելի մի շարք դաշնակիցներ, այդ թվում՝ ԱՄՆ-ը, զսպվածության կոչ են արել։
