17.03.2026 | 23:25
ԻՀՊԿ-ն հաստատել է «Բասիջ» ուժերի հրամանատար Ղոլամռեզա Սուլեյմանիի մահը
ՌԴ պաշտոնյաներն ու ԶԼՄ-ները չեն անդրադարձել Ուկրաինա ներխուժման 2-րդ տարելիցին ձախողումները չքննարկելու համար․ISW
Քաղաքականություն
26.02.2024 | 11:22
Ռուս պաշտոնյաները և պետական լրատվամիջոցները հիմնականում ձեռնպահ են մնացել Ուկրաինա ՌԴ լայնամասշտաբ ներխուժման երկրորդ տարվա տարելիցի հրապարակային քննարկումից՝ հավանաբար փորձելով խուսափել հնարավոր քննադատությունից, թե ինչու Ռուսաստանը չի կարողացել հասնել իր հայտարարած նպատակներին և զգալի կորուստներ է կրել։ Այս մասին գրում են Պատերազմի ուսումնասիրման ամերիկյան ինստիտուտի (ISW) փորձագետները իրենց վերջին զեկույցում, փոխանցում է BBC-ի ռուսական ծառայությունը։
Դաշնային հեռուստաալիքներն իրենց լրատվական թողարկումներում չեն լուսաբանել պատերազմի տարելիցի թեման. միակ հիշատակումը հայտնվել է Միխայիլ Լեոնտևի հեղինակային մեկնաբանությունում Առաջին ալիքի «Ժամանակ» հաղորդման հատուկ բաժնում:
Հասարակական կարծիքի վերջին հարցումը ցույց է տվել, որ ուկրաինական պատերազմի նկատմամբ ռուսների տրամադրությունները հիմնականում անփոփոխ են մնացել վերջին ամիսներին, և քաղաքացիների մեծամասնությունը մեծապես անտարբեր է պատերազմի նկատմամբ, թեև չի աջակցում մոբիլիզացիայի հնարավոր երկրորդ ալիքին:
ISW-ն գրում է, որ ՌԴ նախագահ Վլադիմիր Պուտինը և ռուս պաշտոնյաները, հնարավոր է, ձեռնպահ են մնացել ներխուժման տարելիցը մեկնաբանելուց՝ փորձելով պահպանել այդ անտարբերությունը, որը թույլ կտա շարունակել պատերազմը ՝ հանրային մեծ ընդվզումից չվախենալով։
Փորձագետներն ասում են, որ Պուտինը, ամենայն հավանականությամբ, տեղյակ է և անհանգստացած է, որ մոբիլիզացիայի երկրորդ ալիքը ամենևին էլ պոպուլյար չէ հանրության շրջանում, սակայն ընտրություններից հետո Ռուսաստանի նախագահը կարող է որոշել, որ նոր ուժեր հավաքագրելու անհրաժեշտությունը գերազանցում է համատարած ներքին դժգոհության ռիսկերը:
