Սպիտակ տունը մտահոգված է ԱՄՆ նախագահական ընտրություններին Ռուսաստանի հնարավոր միջամտությունից

Վաշինգտոնը «մտահոգություններ ունի» նոյեմբերին նշանակված ԱՄՆ նախագահական ընտրություններին Ռուսաստանի հնարավոր միջամտության կապակցությամբ։ Այս մասին ամերիկյան NBC News հեռուստաալիքի «Meet the Press» հաղորդման ժամանակ ասել է ԱՄՆ նախագահի ազգային անվտանգության հարցերով խորհրդական Ջեյք Սալիվանը։

«Այսօր ես չեմ կարող խոսել ապացույցների մասին, բայց կարող եմ ասել, որ, իհարկե, կան մտահոգություններ: Կա նախագահական ընտրությունների շուրջ նախապատմություն Ռուսաստանի Դաշնության, նրա հետախուզական ծառայությունների հետ կապված, և կան անհանգստանալու բազմաթիվ պատճառներ», – ասել է Սալիվանը։ Ըստ նրա՝ խոսքն ազգային անվտանգության մասին է։

«Մենք խոսում ենք օտար երկրի, օտար հակառակորդի մասին, որը ձգտում է շահարկել Ամերիկայի Միացյալ Նահանգների քաղաքականությունն ու ժողովրդավարությունը»,- նշել է նա։

Ջո Բայդենի ազգային անվտանգության հարցերով խորհրդականն ավելացրել է, որ Սպիտակ տունը «զգոն» է լինելու՝ կանխելու ընտրություններին միջամտությունը և համագործակցելու Կոնգրեսում երկու կուսակցությունների ներկայացուցիչների հետ, «որովհետև դա (ազգային անվտանգությունը) պետք է վեր լինի քաղաքականությունից»։

2023 թվականի հոկտեմբերին ԱՄՆ հետախուզական ծառայությունները հրապարակել են զեկույց, որում ասվում էր, որ Ռուսաստանը օգտագործում է իր լրտեսների ցանցը, պետական լրատվամիջոցները և սոցիալական ցանցերը՝ խաթարելու հանրության վստահությունը ընտրությունների նկատմամբ: Այնուհետև, այս զեկույցն ուղարկվել է Եվրոպայի, Ասիայի, Աֆրիկայի և Հյուսիսային Ամերիկայի մոտ հարյուր երկրների դեսպանատներ։