ՌԴ դժվարամատչելի և հեռավոր վայրերում մեկնարկել է նախագահական ընտրությունների վաղաժամկետ քվեարկությունը

Ռուսաստանի Դաշնության դժվարամատչելի և հեռավոր վայրերում սկսվել է նախագահական ընտրությունների վաղաժամկետ քվեարկությունը․ հաղորդում է ՏԱՍՍ-ը։

Քվեարկել հնարավոր է այն նավերի վրա, որոնք նավարկելու են քվեարկության հիմնական օրերին (մարտի 15-17): Նման հնարավորություն կունենան նաև որսորդները, ձկնորսները, անտառահատները, հանքափորները, փարոսների և արգելոցի աշխատակիցները:

Ինչպես հաղորդում է ՌԴ ԿԸՀ մամուլի ծառայությունը, մարզային ընտրական հանձնաժողովների անդամները մեկնելու են եղանակային և բևեռային կայաններ, հյուսիսային եղջերուների հովիվների ճամբարներ և հեռավոր բնակավայրեր՝ ուղղաթիռներով, ձնագնացներով և շների սահնակներով։

Փետրվարի 25-ից վաղաժամ քվեարկությունը կսկսվի Ալթայի երկրամասում, Արխանգելսկի մարզում, Կամչատկայում, Կրասնոյարսկի երկրամասերում, Մագադանում, Մուրմանսկի շրջաններում, Պրիմորսկի երկրամասում, Սախայի (Յակուտիա) և Տիվայի հանրապետություններում, Սախալինի շրջանում, Խաբարովսկի երկրամասում, Խանտի-Մանսիյսկի ինքնավար օկրուգում, Չուկոտկայի ինքնավար օկրուգքւմ և Յամալ-Նենեցյան ինքնավար օկրուգում:

Բոլոր մարզերում վաղաժամկետ քվեարկությունը պետք է ավարտվի մինչև մարտի 14-ը։

ՌԴ նախագահական հիմնական ընտրությունները կմեկնարկեն այս տարվա մարտի 15-ին և կտևեն մինչև մարտի 17-ը։ Թեկնածուներն են՝ ԼԴՊՌ կուսակցության ղեկավար Լեոնիդ Սլուցկին, Պետդումայի փոխխոսնակ, «Նոր մարդիկ» կուսակցության անդամ Վլադիսլավ Դավանկովը, Պետդումայի պատգամավոր (ՌԴ Կոմունիստական ​​կուսակցության խմբակցություն) Նիկոլայ Խարիտոնովը և երկրի գործող նախագահ Վլադիմիր Պուտինը։