03.06.2026 | 00:40
Փաշինյանը Էրդողանի հետ քննարկել է Ախալքալաք–Կարս երկաթուղով Հայաստանից արտահանումների հարցը
Բայդենը հայտարարել է ՌԴ-ի դեմ 500 նոր պատժամիջոցների սահմանման մասին՝ Կիևի դեմ պատերազմի ու Նավալնիի մահվան համար
Քաղաքականություն
23.02.2024 | 17:49
ԱՄՆ նախագահ Ջո Բայդենը հայտարարել է ՌԴ-ի դեմ նոր պատժամիջոցներ կիրառելու մասին։ Սպիտակ տան տարածած հաղորդագրության մեջ ասվում է, որ այն ուղղված է Ուկրաինայի դեմ ՌԴ ագրեսիայի տարելիցին և ռուս ընդդիմադիր գործիչ Ալեքսեյ Նավալնիի մահվանը։
Նշվում է, որ «Ուկրաինայի խիզախ ժողովուրդը շարունակում է պայքարել՝ չնահանջելով իր ազատությունն ու ապագան պաշտպանելու վճռականությունից։ ՆԱՏՕ-ն ավելի ուժեղ է, ավելի մեծ և ավելի միասնական, քան երբևէ, իսկ 50 երկրներից բաղկացած աննախադեպ գլոբալ կոալիցիան, որն աջակցում է Ուկրաինային՝ Միացյալ Նահանգների գլխավորությամբ, հավատարիմ է մնում Ուկրաինային կարևոր օգնություն ցուցաբերելուն և Ռուսաստանին պատասխանատվության ենթարկելուն»։
Բայդենը հայտարարել է, որ ամերիկացի ժողովուրդն ու ամբողջ աշխարհը հասկանում են, որ այդ պայքարի խաղադրույքները դուրս են գալիս Ուկրաինայից։
«Տասը տարի առաջ Պուտինն օկուպացրեց Ղրիմը և ստեղծեց խամաճիկ ռեժիմներ Ուկրաինայի Լուգանսկի և Դոնեցկի շրջաններում։ Երկու տարի առաջ նա փորձեց ջնջել Ուկրաինան քարտեզից։ Եթե Պուտինը չվճարի մահվան ու կործանման համար իր գինը, նա կշարունակի ճանապարհը։ Եվ ԱՄՆ-ի ծախսերը՝ Եվրոպայում և ամբողջ աշխարհում ՆԱՏՕ-ի մեր դաշնակիցների և գործընկերների հետ միասին, կբարձրանան»,- ասվում է հայտարարությունում։
«Այսօր ես հայտարարում եմ ավելի քան 500 նոր պատժամիջոցների մասին Ռուսաստանի դեմ՝ Ուկրաինայի դեմ շարունակվող նվաճողական պատերազմի և Ալեքսեյ Նավալնիի մահվան համար, որը խիզախ հակակոռուպցիոն ակտիվիստ էր և Պուտինի ամենակատաղի ընդդիմության առաջնորդը։ Այս պատժամիջոցներն ուղղված կլինեն Նավալնիի բանտարկության հետ կապված անձանց, ինչպես նաև Ռուսաստանի ֆինանսական հատվածի, պաշտպանական արդյունաբերական բազայի, գնումների ցանցերի և պատժամիջոցներից խուսափողների բազմաթիվ մայրցամաքներում: Նրանք կապահովեն, որ Պուտինն ավելի թանկ գին վճարի դրսում իր ագրեսիայի և ներսում բռնաճնշումների համար: Մենք նաև արտահանման նոր սահմանափակումներ ենք սահմանում մոտ 100 կազմակերպությունների համար՝ ռուսական ռազմական մեքենային աջակցություն տրամադրելու համար։ Մենք քայլեր ենք ձեռնարկում Ռուսաստանի էներգետիկ եկամուտներն է՛լ ավելի կրճատելու համար։ Եվ ես իմ թիմին ուղղորդել եմ ուժեղացնել աջակցությունը քաղաքացիական հասարակությանը, անկախ լրատվամիջոցներին և նրանց, ովքեր պայքարում են հանուն ժողովրդավարության ամբողջ աշխարհում»,- նշել է Բայդենը։
Հայտարարության մեջ ասվում է, որ «Ուկրաինային անհրաժեշտ ե ավելի շատ մատակարարումներ ԱՄՆ-ից՝ Ռուսաստանի անողոք հարձակումներին դիմակայելու համար, որոնք հնարավոր են դարձնում Իրանի և Հյուսիսային Կորեայի զենքն ու զինամթերքը: Ահա թե ինչու Ներկայացուցիչների պալատը պետք է ընդունի երկկուսակցական ազգային անվտանգության լրացուցիչ օրինագիծը, քանի դեռ ուշ չէ:
«Կոնգրեսը գիտի, որ աջակցելով այս օրինագծին՝ մենք կարող ենք ամրապնդել անվտանգությունը Եվրոպայում, ամրապնդել մեր անվտանգությունը տանը և կանգնել Պուտինի դեմ: Այս օրինագծի դեմ լինելը միայն իրեն է ձեռնտու։ Հիմա ժամանակն է, որ մենք ամուր կանգնենք Ուկրաինայի հետ և միասնական լինենք մեր դաշնակիցների և գործընկերների հետ: Հիմա ժամանակն է ապացուցելու, որ Միացյալ Նահանգները հանդես է գալիս հանուն ազատության և չի խոնարհվում ոչ մեկի առաջ»,- հայտարարել է ԱՄՆ նախագահը։
