Ուկրաինային թույլ կտան F-16-երով հարվածել Ռուսաստանին․ Ստոլտենբերգ

ՆԱՏՕ-ի գլխավոր քարտուղար Յենս Ստոլտենբերգը հայտարարել է, որ Ուկրաինայի զինված ուժերը կկարողանան հարվածել Ռուսաստանի տարածքին F-16 կործանիչներով, երբ դրանք հասցվեն Կիև, գրում է Radio Free Europe-ը։

Նրա խոսքով՝ Ուկրաինայի յուրաքանչյուր դաշնակից ինքնուրույն կորոշի՝ կործանիչներ մատակարարե՞լ Կիևին, թե՞ ոչ։ Այնուամենայնիվ, ուկրաինական բանակը կկարողանա օգտագործել մատակարարված F-16-երն ինքնապաշտպանության համար, որը ներառում է հարձակումներ Ուկրաինայի սահմաններից դուրս ռուսական օրինական ռազմական օբյեկտների վրա:

Ստոլտենբերգն ընդգծել է, որ Կիևի բոլոր դաշնակիցները ցանկանում են, որպեսզի F-16-երը հնարավորինս շուտ հասանելի լինեն, սակայն կործանիչների ազդեցությունն ավելի մեծ կլինի, եթե օդաչուները և սպասարկող անձնակազմը լավ պատրաստված լինեն:

Նախօրեին CNN-ը հայտնել էր, որ ուկրաինացի առաջին չորս օդաչուները F-16-ով ուսուցումը կավարտեն այս ամառ։ Նրանք սկսել են մարզվել հոկտեմբերի կեսերին Արիզոնա նահանգի Թուսոն քաղաքում: Միաժամանակ, ԱՄՆ-ում վերապատրաստում են անցնում, ընդհանուր առմամբ, 12 օդաչուներ, բոլորը պատրաստ կլինեն թռչել F-16-ով մինչև օգոստոս: Ուկրաինացի ռազմական օդաչուները սովորում են կործանիչներ վարել Մեծ Բրիտանիայում, Ռումինիայում և Դանիայում:

Ուկրաինայի ռազմաօդային ուժերի խոսնակ Յուրի Իգնատը նշել է, որ մարտադաշտում իրավիճակը կարող է փոխել երկու F-16 էսկադրիլիան։

«F-16-ն ի վիճակի է պաշտպանել Ուկրաինան հրթիռային ահաբեկչությունից, քշել ռուսական նավերն ու ռուսական ինքնաթիռները, ինչպես նաև ձեռք բերել առավելություն օդում»,- ընդգծել է նա։