07.10.2026 | 14:35
«Գիտուժ»-ը ահազանգում է․ 2027-ի բյուջեի նախագծում գիտության ռազմավարությամբ նախատեսված ծրագրերը ներառված չեն
Նավալնիի մահը Կիևին օգնությունն ավելացնելու առիթ է․ Ստոլտենբերգ
Քաղաքականություն
22.02.2024 | 17:50
ՆԱՏՕ-ի գլխավոր քարտուղար Յենս Ստոլտենբերգը կարծիք է հայտնել, որ բանտում ռուս ընդդիմադիր գործիչ Ալեքսեյ Նավալնիի մահը և Ավդեևկայից Ուկրաինայի Զինված ուժերի նահանջը պետք է Հյուսիսատլանտյան դաշինքի և նրա դաշնակիցների ուշադրությունը հրավիրեն Կիևին ռազմական օգնությունն ուժեղացնելու անհրաժեշտության վրա, գրում է DW-ի ռուսական ծառայությունը։
«Վստահ եմ, որ Նավալնիի հիշատակը հարգելու լավագույն միջոցը կլինի՝ Պուտինին թույլ չտալ հաղթել մարտի դաշտում, Ուկրաինայի գերակայությունն ապահովել»,- ասել է Ստոլտենբերգը Բրյուսելում «Ազատ Եվրոպա/Ազատություն» ռադիոկայանին տված հարցազրույցում։
ՆԱՏՕ-ի գլխավոր քարտուղարի խոսքով՝ ամիսներ տևած ծանր մարտերից հետո ուկրաինական զորքերի դուրսբերումը Ավդեևկայից ցույց է տալիս, որ Ուկրաինային անհրաժեշտ է ավելի մեծ քանակությամբ ռազմական օգնություն, իսկ Նավալնիի մահը գաղութում և նրա մահվան հանգամանքների հետաձգումը պետք է է՛լ ավելի մեծ ուշադրություն հրավիրի Կրեմլի ռեժիմի ավտորիտար բնույթի վրա։
Ստոլտենբերգը նշել է, որ թեև 61 միլիարդ դոլար արժողությամբ ԱՄՆ ռազմական օգնության նոր փաթեթի հաստատումը Կոնգրեսի Ներկայացուցիչների պալատում հետաձգվում է, այլ երկրներ, այդ թվում՝ Շվեդիան, Կանադան և Ճապոնիան, մեծացնում են իրենց աջակցությունը Կիևին։
