14.12.2025 | 19:26
Մրգի խանութի սեփականատերը զինաթափել է Սիդնեյի լողափին մարդկանց վրա կրակողներից մեկին
ԵՄ-ին Ուկրաինայի անդամակցության շուրջ բանակցությունները դադարեցվել են մինչև ամառ
Քաղաքականություն
22.02.2024 | 12:48
Եվրամիությանն Ուկրաինայի անդամակցության շուրջ բանակցությունները հետաձգվել են, ենթադրաբար, մինչև ամառ։ Այս մասին Բրյուսելում հայտարարել է Եվրահանձնաժողովի նախագահ Ուրսուլա ֆոն դեր Լեյենը։ Նա նշել է, որ չի ակնկալում, որ բանակցությունների համար անհրաժեշտ հիմք կստեղծվի մինչև Եվրախորհրդարանի ընտրությունները, որոնք նախանշված են հունիսի 6-9-ին։
«Դա որոշ ժամանակ կպահանջի»,- ասել է պաշտոնյան՝ հավելելով, որ «ԵՄ-ն կարող է պատրաստ լինել մինչև ամառվա սկիզբը», գրում է DW-ի ռուսական ծառայությունը:
Ըստ ֆոն դեր Լեյենի՝ Եվրահանձնաժողովը ներկայում աշխատում է Ուկրաինայի հետ բանակցությունների «ուղղորդող սկզբունքների շրջանակի» վրա, որն այնուհետև պետք է միաձայն հաստատվի ԵՄ անդամ բոլոր 27 երկրների կողմից:
Դեկտեմբերի կեսերին Եվրամիության գագաթնաժողովի մասնակիցները սկսել են Ուկրաինայի և Մոլդովայի հետ ԵՄ անդամակցության բանակցությունները, սակայն ընդգծել են, որ նման բանակցություններում հաջողությունը սերտորեն կապված է այդ երկրներում բարեփոխումների հաջողության հետ: Բացի այդ, եվրոպական պետությունների և ԵՄ կառավարությունների ղեկավարները որոշել են Վրաստանին տրամադրել ԵՄ անդամակցության թեկնածու երկրի կարգավիճակ։
Ակնկալվում էր, որ այս որոշումը կարող է արգելափակվել Հունգարիայի կողմից, որի վարչապետ Վիկտոր Օրբանը բազմիցս և չափազանց կտրականապես դեմ է արտահայտվել այս բանակցությունների մեկնարկին։ Օրբանն ասել է, որ Ուկրաինան բարեփոխումների կարիք ունի, որը, ըստ նրա, դեռ չի իրականացրել։ Ըստ ԵՄ շրջանակների տեղեկությունների՝ որոշումը կայացվել է այն ժամանակ, երբ Վիկտոր Օրբանը բացակայում էր նիստերի դահլիճից։ Սակայն Եվրոպական խորհրդի քվորումը պահպանվել է։ Ինքը՝ Օրբանը, ֆեյսբուքյան իր էջում հայտնել է, որ ձեռնպահ է քվեարկել, քանի որ չի ցանկանում մասնակցել «վատ որոշմանը»։
