Քաղաքականություն
20.02.2024 | 18:43
Հունգարիայի խորհրդարանը ՆԱՏՕ-ին Շվեդիայի անդամակցության հայտի վավերացման օգտին կքվեարկի փետրվարի 26-ին՝ արձակուրդից պատգամավորների վերադառնալու առաջին օրը։ Այս մասին ֆեյսբուքում հայտնել է իշխող կուսակցության «ՖԻԴԵՍ-Հունգարական քաղաքացիական միություն» խորհրդարանական խմբակցության ղեկավար Մատե Կոսիչը։ Նրա խոսքով՝ պատգավորները մտադիր են աջակցել ՆԱՏՕ-ին Շվեդիայի անդամակցությանը, գրում է DW-ի ռուսական ծառայությունը։
Շվեդիան Հյուսիսալանտյան դաշինքին անդամակցության հայտ է ներկայացրել Ֆինլանդիայի հետ միաժամանակ՝ 2022 թվականի մայիսի 18-ին, իսկ անդամակցության արձանագրությունները ստորագրվել են հուլիսի 5-ին։ Մինչև 2023 թվականի ապրիլի 4-ը Շվեդիայի անդամակցությունը ՆԱՏՕ-ին վավերացրել էին դաշինքի անդամ բոլոր երկրները՝ բացի Թուրքիայից և Հունգարիայից: Այս տարվա հունվարի 23-ին Թուրքիայի խորհրդարանը վավերացրեց Շվեդիայի անդամակցության հայտը:
Թեպետ Հունգարիայի վարչապետ Վիկտոր Օրբանը բազմիցս հայտարարել է, որ իր կառավարությունն աջակցում է Շվեդիայի՝ ՆԱՏՕ-ին անդամակցությանը, սակայն իշխող ուժի պատգամավորները բոյկոտեցին փետրվարի 5-ի խորհրդարանական հանդիպումը, որում պետք է քննարկվեր հարցը։
Մասնավորապես, նրանք պահանջում էին, որ Շվեդիայի վարչապետ Ուլֆ Քրիստերսոնն այցելի Բուդապեշտ՝ փոխհատուցելու Ստոկհոլմի կողմից Հունգարիայի՝ ժողովրդավարությունից նահանջի ենթադրյալ քննադատությունը:
Ի պատասխան՝ Քրիստերսոնն ասել էր, որ դադարեցնում է Շվեդիայի հայտի շուրջ Բուդապեշտի հետ բոլոր հետագա բանակցությունները, սակայն պատրաստ կլինի հանդիպել Օրբանի հետ արձանագրության վավերացումից հետո։
