Բելառուսի գաղութներից մեկում մահացել է Լուկաշենկոյին զրպարտելու համար դատապարտված Իգոր Լեդնիկը

64-ամյա քաղբանտարկյալ, լրագրող և հասարակական գործիչ Իգոր Լեդնիկը, որը երեք տարվա ազատազրկման էր դատապարտվել Բելառուսի ղեկավար Ալեքսանդր Լուկաշենկոյի զրպարտության գործով (ՌԴ Քրեական օրենսգրքի 367-րդ հոդվածի 2-րդ մաս), մահացել է Մոգիլև N15 ուղղիչ գաղութում։ Այս մասին հայտնում է Բելառուսի սոցիալ-դեմոկրատական կուսակցության Telegram-ալիքը, փոխանցում է Current time-ը։

Քաղբանտարկյալի մահվան պատճառը պաշտոնապես չի հայտարարվել։ Ըստ նրա փաստաբանի՝ Լեդնիկի առողջական վիճակը զգալիորեն վատացել է գաղութում, նա աղեստամոքսային տրակտի վիրահատություն է տարել: Բացի այդ, դատապարտյալն ունեցել է 2-րդ կարգի հաշմանդամություն՝ սրտի հետ կապված խնդիրների պատճառով։

Իգոր Լեդնիկը կալանավորվել է 2022 թվականի ապրիլի 18-ին։ Նրան մեղադրանք է առաջադրվել Լուկաշենկոյին զրպարտելու համար՝ 2020 թվականի դեկտեմբերին «Բելառուսի միջազգայնորեն ճանաչված չեզոքությունը ԵԱՀԿ տարածաշրջանի անվտանգության երաշխիքն է» վերտառությամբ հոդվածի պատճառով։

Տղամարդը նախ 15 օրով վարչական կալանքի է ենթարկվել, սակայն այս ժամկետի ավարտին քննչական մեկուսարանից ազատ չի արձակվել, այլ նույն տարվա սեպտեմբերին նրա դեմ քրեական գործ է հարուցվել և դատավճիռ կայացվել։ 2022 թվականի հուլիսին Բորիսովի շրջանային դատարանը Իգոր Լեդնիկի Facebook-յան էջը ճանաչել է որպես «ծայրահեղական նյութ»։

Կենդանության օրոք Իգոր Լեդնիկը հանդես էր գալիս Բելառուսի և Ռուսաստանի միութենական պետության լուծարման օգտին և կարծում էր, որ Բելառուսում խախտվել է Բուդապեշտի հուշագիրը, ինչը հանգեցրել է Բելառուսում բռնապետության հաստատման, Ռուսաստանի հետ մերձեցման և տարածաշրջանում եվրոպական անվտանգության խաթարման։ Լեդնիկը, ըստ «Գարուն» իրավապաշտպան կենտրոնի, դարձել է հինգերորդ բելառուս քաղբանտարկյալը, որը մահացել է բանտում։