Հասարակություն
20.02.2024 | 12:21
Հակակոռուպցիոն դատարանում` նախագահությամբ դատավոր Տիգրան Դավթյանի, քիչ առաջ սկսվեց ՊԵԿ նախկին նախագահ Գագիկ Խաչատրյանի որդու` Արտյոմ Խաչատրյանի, եղբորորդու` Արամ Խաչատրյանի, «Մուլտի գրուպ կոնցեռն» ընկերության նախկին տնօրեն, այժմ` խորհրդատու Սեդրակ Առուտամյանի ու ևս մեկ անձի` Աշոտ Պապիկյանի վերաբերյալ քրեական գործի քննությունը: Մեղադրյալները չառարկեցին նիստի տեսանկարահանման դեմ, դատավոր Տիգրան Դավթյանը թույլատրեց տեսանկարահանումը:
Դատարանի հարցերին պատասխանելիս Արտյոմ Խաչատրյանն ասաց, որ սովորել է Երևանի պետական համալսարանում, Գիտությունների ազգային ակադեմիայում, Անգլիայի բիզնես դպրոցում և Օքսֆորդի համալսարանում:
Արամ Խաչատրյանը ևս նշեց, որ բացի Հայաստանում ուսում ստանալուց նաև Օքսֆորդի համալսարանում կրթական ծրագրերի է մասնակցել:
Խաչատրյանները նշեցին, որ երկուսն էլ խնամքին երեք անչափահաս երեխա ունեն:
Մյուս երկու մեղադրյալները` Սեդրակ Առուտամյանն ու Աշոտ Պապիկյանն խնամքի տակ անչափահասներ չունեն, Առուստամյանը հայտնեց, որ այժմ ինքն աշխատում է «Մուլտի գրուպ կոնցեռն»-ում` որպես խորհրդատու, իսկ Աշոտ Պապիկյանն ասաց, որ որպես վարորդ է աշխատում:
Նիստի մեկնարկին Արտյոմ Խաչատրյանի պաշտպան Երեմ Սարգսյանը նշեց, որ մեղադրական եզրակացությունը չի համապատասխանում քրեական դատավարության օրենսգրքի պահանջներին, որ դրա բովանդակության մեջ տարանջատված չեն քրեական գործ հարուցելու հիմքն ու առիթը, ուստի՝ դատարանին միջնորդեց հետաձգել նիստը և հանրային մեղադրողին պարտավորեցնել մեղադրական եզրակացությունը համապատասխանեցնել օրենքի պահանջներին:
