Պեսկովը հայտարարել է, որ Ուկրաինայի հարցում ՌԴ-ի և ՀՀ-ի դիրքորոշումները «տրամագծորեն տարբերվում են»

Մոսկվայի և Երևանի դիրքորոշումներն Ուկրաինայի հարցում տրամագծորեն տարբերվում են, սակայն ՌԴ-ն շարունակելու է համառորեն բացատրել իր ճշմարտացիությունը։ Այս մասին լրագրողներին ասել է ՌԴ նախագահի մամուլի քարտուղար Դմիտրի Պեսկովը՝ մեկնաբանելով ՀՀ վարչապետ Նիկոլ Փաշինյանի հայտարարությունը, թե Ուկրաինայի հարցում Հայաստանը Ռուսաստանի դաշնակիցը չէ, գրում է ՏԱՍՍ-ը։

«Իսկապես, մենք տրամագծորեն հակառակ տեսակետներ ունենք Ուկրաինայում տեղի ունեցողի և Ուկրաինայի շուրջ հակամարտության վերաբերյալ: Դա գաղտնիք չէ։ Դա մեր հայ գործընկերների հայտնի դիրքորոշումն է։ Մենք նրանց հետ այդ հարցում համաձայն չենք ու շարունակելու ենք համառորեն բացատրել մեր ճշմարտացիությունը»,- ասել է Պեսկովը։

Հիշեցնենք՝ նախօրեին Մյունխենում հայ համայնքի ներկայացուցիչների հետ հանդիպմանը Նիկոլ Փաշինյանը ևս մեկ անգամ կրկնել էր, որ Ուկրաինայի հարցում ՀՀ-ն Մոսկվայի դաշնակիցը չէ։

«Վաղուց եմ ասել՝ Ուկրաինայի հարցով Հայաստանը Ռուսաստանի դաշնակիցը չէ, և սա մեր անկեղծ դիրքորոշումն է: Առաջին անգամ այս մասին ասել եմ երկու տարի առաջ, և շատ ցավում ենք, որ չենք կարող որևէ ազդեցություն ունենալ այդ իրադրության վրա։ Ուկրաինայի ժողովուրդը մեր բարեկամ ժողովուրդն է»,- ասել է Նիկոլ Փաշինյանը։

Նա նաև նշել է, որ Ուկրաինայի հարցում ՀՀ ընկալումն այն է, որ Ալմա-Աթայի հռչակագիրն է երկրների անկախությունները ճանաչելու, տարածքային ամբողջականությունները ճանաչելու հիմքը:

«Մեր տրամաբանությամբ՝ նույնը պետք է գործի նաև Ուկրաինայի պարագայում, որովհետև այդ թուղթը վերաբերում է բոլորիս: Եվ եթե դա քանդում ենք, ուրեմն քանդում ենք ամեն ինչ»,- նշել է Փաշինյանը։