01.11.2024 | 23:19
Հրդեհ Գյումրու տներից մեկում
ՌԴ ՔԿ-ն հայտարարել է Նավալնիի մահվան հանգամանքների հետաքննության երկարաձգման մասին և հրաժարվել է նրա մարմինը հանձնել հարազատներին
Քաղաքականություն
19.02.2024 | 14:15
ՌԴ Քննչական կոմիտեն ընդդիմադիր գործիչ Ալեքսեյ Նավալնիի մորը հայտնել է, որ գաղութում նրա մահվան հետաքննությունը երկարացվել է անորոշ ժամանակով, և հրաժարվել է նրան հանձնել որդու դին։ Այս մասին հայտնել են քաղաքական գործչի գործընկերները։
«Վաղ առավոտյան Ալեքսեյի մայրը և փաստաբանները գնացել են դիահերձարան։ Նրանց ներս չեն թողնում։ Փաստաբաններից մեկին բառացիորեն դուրս են հրել։ Հարցին՝ արդյո՞ք Ալեքսեյի դին այնտեղ է, աշխատակիցները չեն պատասխանում»,- Տելեգրամում գրել է քաղաքական գործչի մամուլի քարտուղար Կիրա Յարմիշը։
The Moscow Times-ը նշում է, որ Քննչական կոմիտեի հետաքննությունն իշխանություններին թույլ է տալիս օրինական կերպով 30 օր չտրամադրել Նավալնիի մարմինը հարազատներին։
Հիշեցնենք՝ փետրվարի 16-ին դաշնային քրեակատարողական ծառայությունը հայտնեց, որ ռուս ընդդիմադիր գործիչ Ալեքսեյ Նավալնին մահացել է Յամալո-Նենեց ինքնավար օկրուգի գաղութներից մեկում։ Փետրվարի 17-ի առավոտյան Նավալնիի մայրը ժամանել է Խարպի թիվ 3 ուղղիչ գաղութ և ստացել ծանուցում նրա մահվան մասին։
Գաղութի ղեկավարությունը հայտնել է, որ Նավալնիի մարմինը գտնվում է Սալեխարդի դիահերձարանում։ Երբ քաղաքական գործչի մայրը գնացել է այնտեղ, նրան ասել են, որ դիակը չկա։ Ավելի ուշ Նավալնիի մամուլի քարտուղար Կիրա Յարմիշը հայտնել է, որ Քննչական կոմիտեն հրաժարվել է մարմինը հանձնել հարազատներին, քանի դեռ ստուգումները չեն ավարտվել։ «Նովայա գազետա Եվրոպա»-ն, հղում անելով իր աղբյուրին, հայտնել է, որ Նավալնիի մարմինը գտնվում է Սալեխարդի շրջանի կլինիկական հիվանդանոցի դիահերձարանում։ Ըստ հրապարակման՝ քաղաքական գործչի մարմինը հիվանդանոց է տեղափոխվել փետրվարի 16-ի երեկոյան։
