02.06.2024 | 21:37
Բագրատ արքեպիսկոպոս Գալստանյանը գնալու է Լոռի, Գեղարքունիք և Սյունիք
Ֆինլանդիայի վարչապետը հայտարարել է, որ երկրում ԱՄՆ-ի միջուկային զենք տեղակայելու ծրագրեր չկան
Քաղաքականություն
19.02.2024 | 17:10
Ֆինլանդիան չի տեսնում ԱՄՆ միջուկային զինանոցն իր տարածքում հյուրընկալելու անհրաժեշտությունը։ Այս մասին լեհական Rzeczpospolita-ին տված հարցազրույցում հայտարարել է Ֆինլանդիայի վարչապետ Փեթերի Օրպոն։
Նրա խոսքով՝ Հելսինկին մանրակրկիտ պատրաստվում է իրականացնել իր խնդիրները ՆԱՏՕ-ի շրջանակում և արդեն մասնակցում է դաշինքի համար պոտենցիալ սպառնալիքների զսպմանը սովորական սպառազինության միջոցով:
«Դա անհրաժեշտ չէ, քանի որ ՆԱՏՕ-ն ինքն է ապահովում միջուկային զսպում: Միջուկային զենքը տեղակայված է դաշինքի մի քանի երկրներում, և դա բավական է»,- ասել է Ֆինլանդիայի վարչապետը։
Անցյալ տարվա դեկտեմբերին Ֆինլանդիայի իշխանությունները համաձայնագիր էին ստորագրել Միացյալ Նահանգների հետ, որով Պենտագոնին թույլատրվում էր մուտք գործել, ընդհանուր առմամբ, 15 ֆիննական ռազմական օբյեկտներ: Ամերիկացիները կկարողանան այնտեղ տեղակայել զորքեր, զենք ու տեխնիկա։
Կրեմլը հայտարարել է, որ համաձայնագիրն «ակնհայտ վտանգ կներկայացնի Ռուսաստանի համար»: ՌԴ նախագահ Վլադիմիր Պուտինը զգուշացրել է, որ եթե Ֆինլանդիայում ՆԱՏՕ-ի զորքեր ու ենթակառուցվածքներ տեղակայվեն, Ռուսաստանը նույն կերպ կպատասխանի։
