07.10.2026 | 14:02
Պուտինն ու Փաշինյանը քննարկել են օրակարգային հարցեր
Ռուսաստանի իշխանությունների արձագանքը Նավալնիի մահվանը
Քաղաքականություն
16.02.2024 | 20:39
ՌԴ Պետդումայի խոսնակ Վյաչեսլավ Վոլոդինն ընդդիմադիր գործիչ Ալեքսեյ Նավալնիի մահվան մեջ մեղադրել է Արևմուտքին, գրում է BBC-ի ռուսական ծառայությունը։
«Նրանց անունները հայտնի են՝ ՆԱՏՕ-ի գլխավոր քարտուղարից և ԱՄՆ ղեկավարությունից մինչև Շոլց, Սունակ և Զելենսկի, նրանք բոլորը Նավալնիի մահվան մեղավորներն են։ Հենց նրանց է շահեկան նրա մահը, ովքեր հսկայական թվով ձախողված որոշումներ են կայացրել և կառչած են իրեն պաշտոններից»,- նշել է Վոլոդինը Telegram-ի ալիքում։
Նավալնիի մահվան լուրը մեկնաբանել է նաև ՌԴ ԱԳՆ-ն։
«ՆԱՏՕ-ի երկրների ղեկավարների անմիջական արձագանքը Նավալնիի մահվանը՝ Ռուսաստանին ուղղված ուղղակի մեղադրանքների տեսքով, ինքնաբացահայտում է։ Դեռևս դատաբժշկական փորձաքննություն չկա, բայց Արևմուտքի եզրակացություններն արդեն պատրաստ են»,- հայտարարել է նախարարության պաշտոնական ներկայացուցիչ Մարիա Զախարովան։
Կրեմլի խոսնակ Դմիտրի Պեսկովն էլ հաղորդագրություններից և Նավալնիի մահից անմիջապես հետո ասել էր, որ այդ մասին տեղեկացրել են Վլադիմիր Պուտինին։
Հիշեցնենք՝ թունավորման հետևանքներից երկարատև բուժումից հետո 2021 թվականի հունվարի 17-ին Ալեքսեյ Նավալնին Գերմանիայից վերադարձավ Ռուսաստան։ Ընդդիմադիր գործչին բերման ենթարկեցին հենց Մոսկվայի օդանավակայանից։ Այդ ժամանակից Նավալնին բանտում է։ Նա մեղավոր է ճանաչվել երեք գործերով և դատապարտվել երկարաժամկետ ազատազրկման։
Նավալնիի հիմնադրած քաղաքական կառույցները Ռուսաստանի իշխանությունների կողմից ճանաչվել են «ծայրահեղական կազմակերպություններ», իսկ Նավալնիի հարյուրավոր համախոհներ կա՛մ ենթարկվել են քրեական հետապնդման, կա՛մ ստիպված են եղել լքել Ռուսաստանը: Ընդդիմադիր գործչին առնչվող ևս մի քանի քրեական գործ քննության փուլում է։ Նավալնիին սպառնում էր ցմահ ազատազրկում։
Այսօր ավելի վաղ Յամալո-Նենեց ինքնավար օկրուգի դաշնային քրեակատարողական ծառայությունը հայտնեց բանտում ընդդիմադրի մահվան մասին։ Ըստ այդ տեղեկությունների՝ Նավալնին իրեն վատ է զգացել զբոսանքից հետո՝ գրեթե անմիջապես կորցնելով գիտակցությունը։ Նշվում է, որ շտապօգնության բժիշկները հաստատել են դատապարտյալի մահը։
Նավալնիի փաստաբաններն ու համախոհները դեռ չեն հաստատել նրա մահը։ Նրա փաստաբանը մեկնել է Խարպի գաղութ։ Միջազգային հանրությունը բուռն է արձագանքել ընդդիմադրի մահվան մասին տեղեկաթյանն ու նրա մահվան մեջ մեղադրել է ՌԴ իշխանություններին։
