12.08.2026 | 10:13
Մեր աշակերտները արհեստական բանականության միջազգային օլիմպիադայում թիմային պայքարում 5-րդ տեղն է զբաղեցրել. ԿԳՄՍ նախարար
Թուրքիան ԵԽԽՎ-ում Ադրբեջանի լիազորությունների կասեցման որոշումը վերանայելու կոչ է անում
Քաղաքականություն
16.02.2024 | 16:26
Թուրքիայի ԱԳՆ-ն հայտարարություն է տարածել՝ քննադատելով ԵԽԽՎ-ի կողմից Ադրբեջանի պատվիրակության լիազորությունները մեկ տարով դադարեցնելու որոշումը։
«Մենք ցավում ենք, որ Ադրբեջանի Ազգային պատվիրակության հավատարմագրերը չվավերացվեցին Եվրոպայի խորհրդի Խորհրդարանական վեհաժողովի կողմից։ Այս բանաձևն անհամատեղելի է ժողովրդավարական արժեքների հետ և խաթարում է հավասար ներկայացվածության իրավունքը»,- ասվում է հայտարարության մեջ։
Ըստ Անկարայի՝ այս որոշումը խանգարում է տարածաշրջանի կայունությանն ու խաղաղությանն ուղղված ջանքերին։
«Ակնհայտ է նաև, որ այս քայլը, որը նշանակում է համագործակցության և երկխոսության ուղիների փակում, կխոչընդոտի տարածաշրջանային խաղաղության և կայունությանն ուղղված ջանքերին։ Թուրքիան ԵԽԽՎ-ին կոչ է անում հնարավորինս արագ ուղղել այդ սխալը և կենտրոնանալ Հարավային Կովկասում խաղաղության հաստատման ջանքերի վրա»,- նշվում է հայտարարության մեջ։
Հիշեցնենք՝ հունվարի 24-ին ԵԽԽՎ-ն քվեարկությամբ որոշել է չվավերացնել Ադրբեջանի պատվիրակության լիազորությունները։ Այս որոշմամբ Ադրբեջանի պատվիրակությունն առնվազն մեկ տարով հեռացվել է ԵԽԽՎ-ից և կարող է վերադառնալ՝ իր կանոնակարգային պարտավորությունները կատարելու դեպքում։ Ադրբեջանական պատվիրակության նկատմամբ քաղաքական պատժամիջոցներ սահմանող որոշմանը կողմ է քվեարկել 76, դեմ՝ 10 պատգամավոր, ևս 4 խորհրդարանական ձեռնպահ է մնացել։ Դեմ են քվեարկել Թուրքիայի պատվիրակությունից 9 պատգամավոր, ևս մեկ պատգամավոր էլ Ալբանիայից։ Ուշագրավ է, որ Թուրքիայի 18 հոգանոց պատվիրակությունից քվեարկությանը մասնակցել էր 10 պատգամավոր, որից մեկը կողմ էր քվեարկել Ադրբեջանին հեռացնելու որոշմանը։
Ի դեպ, օրերս էլ ԵԽԽՎ-ում Սերբիայի պատվիրակությունն էր բողոք հղել կառույցի նախագահ Թեոդորոս Ռուսոպուլոսին Ադրբեջանի պատվիրակության դեմ ընդունված որոշման կապակցությամբ։
Էմմա Չոբանյան
