Սպիտակ տունը հաստատել է տիեզերքում Ռուսաստանի կողմից սպառնալիքի առկայությունը

Սպիտակ տունը հինգշաբթի օրը հաստատել է, որ ԱՄՆ օրենսդիրների կողմից նախօրեին բարձրաձայնված ազգային անվտանգությանն առնչվող սպառնալիքը կապված է տիեզերքում արբանյակների դեմ Ռուսաստանի կողմից զենք ստեղծելու հետ: ԱՄՆ նախագահ Ջո Բայդենն արդեն կարգադրել է Մոսկվայի հետ կապ հաստատել այդ հարցով, գրում է BBC-ի ռուսական ծառայությունը։

«Դա պայմանավորված է հակաարբանյակային ներուժով, որը զարգացնում է Ռուսաստանը։ Նախ՝ սա արդեն իսկ գործարկված ակտիվ ներուժ չէ։ Եվ թեև այս կոնկրետ կարողությունը ստեղծելու Ռուսաստանի ձգտումը մտահոգիչ է, որևէ մեկի անվտանգությանն անմիջական վտանգ չկա»,- ճեպազրույցում ասել է Սպիտակ տան Ազգային անվտանգության խորհրդի ռազմավարական հաղորդակցությունների համակարգող Ջոն Քիրբին:

Նրա խոսքով՝ խոսքը զենքի մասին չէ, որը կարող է օգտագործվել Երկրի վրա մարդկանց կամ օբյեկտների հարվածելու համար, սակայն Վաշինգտոնը ուշադիր հետևում է Ռուսաստանի գործունեությանը և շատ լուրջ է վերաբերվում դրան։ Նա տիեզերքում զենքի տեղակայումն անվանել է միջազգային իրավունքի և պայմանագրերի խախտում, որոնք ստորագրել են ավելի քան 130 երկրներ, այդ թվում՝ Ռուսաստանը։

«ԱՄՆ նախագահ Ջո Բայդենը հրամայել է մի շարք նախնական գործողություններ, ներառյալ լրացուցիչ ճեպազրույցներ Կոնգրեսի առաջնորդների հետ, ուղիղ դիվանագիտական հարաբերություններ Ռուսաստանի, մեր դաշնակիցների և գործընկերների և աշխարհի այլ երկրների հետ, որոնց շահերը վտանգված են», – ավելացրել է Քիրբին: Նա նաև հավելել է, որ Սպիտակ տունը կանաչ լույս չի տվել ռուսական սպառնալիքի մասին հետախուզական տվյալների հրապարակման համար։
Չորեքշաբթի օրը Ներկայացուցիչների պալատի հետախուզության հանձնաժողովի նախագահ, հանրապետական Մայք Թերները հայտարարել էր, որ հանձնաժողովը Կոնգրեսի անդամներին տեղեկատվություն է տրամադրել Միացյալ Նահանգների «ազգային անվտանգությանը սպառնացող լուրջ սպառնալիքի» մասին։ Ամերիկյան լրատվամիջոցների աղբյուրներն անմիջապես հայտնել են, որ սպառնալիքը կապված է Ռուսաստանի և տիեզերքում միջուկային զենքի հնարավոր տեղակայման հետ։