Տասնամյակի լարվածությունից հետո Թուրքիան ու Եգիպտոսը նոր էջ են բացում հարաբերություններում

Թուրքիայի նախագահ Ռեջեփ Թայիփ Էրդողանն ու Եգիպտոսի նախագահ Աբդել Ֆաթահ ալ-Սիսին Կահիրեում հանդիպումից հետո հայտարարել  են, որ ավելի քան մեկ տասնամյակ լարվածությունից հետո երկու երկրները նոր էջ են բացում իրենց հարաբերություններում:

«Կարծում եմ, որ այս այցը նոր շրջադարձային կետ կլինի մեր հարաբերություններում»,- մամուլի ասուլիսում, մասնավորապես, հայտարարել է Էրդողանը։

Եգիպտոսի առաջնորդն արձագանքել է ուղերձին. «Մենք կարող ենք միասին նոր էջ բացել մեր երկրների միջև այնպես, որ հարստացնի մեր երկկողմ հարաբերությունները և դրանք դնի ճիշտ ուղու վրա»։

Երկու առաջնորդները նաև քննադատել են Իսրայելի ռազմական գործողությունները Գազայի հատվածում և կոչ են արել դադարեցնել կրակը:

Բանակցությունների արդյունքում երկու երկրները ստորագրել են նաև մի շարք համագործակցության համաձայնագրեր, այդ թվում՝ զբոսաշրջության, մշակույթի և կրթության ոլորտներում։ Կողմերը նաև պայմանավորվածություն են ձեռք բերել բարձրացնել երկու երկրների միջև ռազմավարական համագործակցության խորհրդի մեխանիզմը։

«Հարգարժան եղբորս ասացի, որ սպասում եմ նրան տեսնելու Անկարայում առաջին իսկ հնարավորության դեպքում՝ մեր խորհրդի նիստն անցկացնելու համար»,- ասել է Էրդողանը։

Հավելենք, որ Էրդողանի այցը Կահիրե եգիպտա-թուրքական առաջնորդների առաջին գագաթնաժողովն է 2012 թվականից ի վեր: 2013 թվականին Եգիպտոսում տեղի ունեցած ռազմական հեղաշրջումից հետո, որը տապալել էր «Մահմեդական եղբայրների» կառավարությունը՝ Թուրքիայի դաշնակից Մուհամեդ Մուրսիի գլխավորությամբ, Կահիրեի և Անկարայի միջև հարաբերությունները կտրուկ սրվել էին։

Նախորդ տարի հունիսին Էրդողանի վերընտրվելուց հետո երկու երկրները հուլիսին լիովին վերականգնեցին դիվանագիտական հարաբերությունները: Այնուհետև նոյեմբերին Էրդողանը և Սիսին հանդիպել էին Հնդկաստանում G-20-ի գագաթնաժողովի շրջանակներում։

Էմմա Չոբանյան