ՆԱՏՕ-ն կսկսի ուկրաինական բանակի վերապատրաստումը պաշտպանության ոլորտում․ El País

ՆԱՏՕ-ի ղեկավարությունը պատրաստվում է ժամանակակից ուսումնական կենտրոն ստեղծել Ուկրաինայի զինված ուժերի զինվորականների պատրաստման և կրթության համար, El País-ին հայտնել են իրազեկ աղբյուրները։ Նրանց խոսքով՝ նոր նախագիծը կլրացնի Եվրամիության առաքելությունը և որոշ արևմտյան երկրների ծրագրերը, որոնք արդեն պատրաստում են Ուկրաինայի զինված ուժերի զինծառայողներին։

Նպատակն է աջակցել Ուկրաինային և օգնել նրա ուժերը համապատասխանեցնել ՆԱՏՕ-ի չափանիշներին: Այս պահին դաշինքի անդամները վերջնական տեսքի են բերում ծրագրի մանրամասները, որը մինչ այժմ չէին համարձակվում գործարկել, քանի որ Ռուսաստանը դա կարող էր ընկալել որպես սպառնալիք, նշում է El País-ը։

Մասնավորապես, ՆԱՏՕ-ի երկրները քննարկում են, թե ինչպես է ֆինանսավորվելու այս նախաձեռնությունը և ինչ մարզիչներ պետք է հավաքագրվեն։ Նախագծի մանրամասները պետք է մշակեն դաշինքի պաշտպանության նախարարները փետրվարի 14-ին և 15-ին Բրյուսելում կայանալիք հանդիպումներում։

Նախագիծը վերջնական հաստատում կստանա այս տարվա հուլիսին Վաշինգտոնում կայանալիք ՆԱՏՕ-ի գագաթնաժողովում:

Ուկրաինայում պատերազմի սկսվելուց հետո շատ արևմտյան երկրներ սկսեցին ուկրաինացի զինվորականներին պատրաստել սեփական ռազմակայաններում։ Բայց ՆԱՏՕ-ն դրա համար դեռ մասնագիտացված կենտրոններ չի ստեղծել։ Միաժամանակ, դաշինքի գլխավոր քարտուղար Յենս Ստոլտենբերգը կոչ է արել Արևմուտքին պատրաստվել Ռուսաստանի հետ տասնամյակների առճակատմանը և մեծացնել ռազմական իրավասությունները։

2023 թվականի ամռանը ՆԱՏՕ-ի գագաթնաժողովում G7 երկրները ստորագրեցին հռչակագիր, որով Ուկրաինային անվտանգության երաշխիքներ են տրամադրում։ Ի թիվս այլ բաների, նրանք խոստացել են օգնել Ուկրաինայի պաշտպանական արդյունաբերության զարգացմանը, հետախուզության փոխանակմանը, ժամանակակից սպառազինությունների տեղափոխմանը Կիև, ներառյալ հակաօդային պաշտպանության համակարգերը, հրետանին, հեռահար զենքերը, զրահատեխնիկան և մարզել Ուկրաինայի զինված ուժերը: