05.08.2026 | 13:54
Արարատ Միրզոյանը Սոկոլովի և ԱՄՆ բանագնացի հետ քննարկել է ԹՐԻՓՓ ծրագրին վերաբերող հարցեր
Պուտինին ՀՀ-ում չձերբակալելու մեկ տարբերակ կա. Երևանը Կրեմլին այլ առաջարկ չունի․ ՏԵՍԱՆՅՈՒԹ
Քաղաքականություն
14.02.2024 | 20:27
Վլադիմիր Պուտինին Հայաստանում կձերբակալե՞ն, թե՞ ոչ։ Պաշտոնական Երևանը Հռոմի ստատուտը վավերացնելուց և Միջազգային քրեական դատարանի անդամ դառնալուց հետո այս հարցին հստակ չի պատասխանում։ Պուտինին ձերբակալելու թեման օրակարգում կրկին հայտնվեց բրիտանացի լրագրողի՝ Փաշինյանին ուղղված հարցերից հետո։
Փաշինյանի խուսափողական պատասխանից հետո իրավիճակը որոշ չափով հստակեցնող մեկնաբանություններ է արել Հայաստանի Միջազգային իրավական հարցերով ներկայացուցիչ Եղիշե Կիրակոսյանը։ Ըստ պաշտոնյայի՝ մեկ տարբերակ կա՝ Հայաստանն ու Ռուսաստանը պետք է երկկողմ պայմանագիր ստորագրեն։
Մոսկվան չի պարզաբանում՝ ինչո՞ւ չի ցանկանում նման երկկողմ պայմանագիր ստորագրել։ Կրեմլից միայն մեղադրանքներ են հնչում Հայաստանի հասցեին Հռոմի ստատուտին միանալու առնչությամբ, իսկ թեմայի վերջին ակտիվացման ֆոնին Մոսկվան հստակ հավաստացիումներ է պահանջում Երևանից։ Կրեմլի խոսնակ Դմիտրի Պեսկովը հայտարարել է՝ վճռական են հարցը քննարկել հայ գործընկերների հետ մինչև Պուտինի հնարավոր այցը Հայաստան։
Եղիշե Կիրակոսյանը երեկ «Առաջին ալիքի» երթերում հայտարարեց՝ Մոսկվային նոր առաջարկներ չունեն ներկայացնելու։ Այլ լավ առաջարկներ չկան, պայմանագրի ստորագրումն է մնացել, որն էլ, ըստ Կիրակոսյանի, կարող է ժամանակավրեպ լինել։
ԺԱԱ խորհրդի նախագահ Լևոն Բարսեղյանի խոսքով՝ ՀՀ-ի անդամակցությունը ՄՔԴ-ին կարժեզրկվի, եթե որևէ մեկի համար բացառություն արվի։
Հայաստանի Եվրոպական կուսակցության նախագահ Տիգրան Խզմալյանը ստատուտի վավերացումից հետո երկկողմ պայմանագրի ստորագրումը խնդրահարույց է համարում։ Այնինչ, քաղաքական մեկնաբան Հակոբ Բադալյանը խոսքով՝ այս անորոշ վիճակը շահավետ է, թե՛ Ռուսաստանի, թե՛ Հայաստանի համար։
Տիգրան Խզմալյանի խոսքով՝ եթե ՀՀ-ն ցանկանում է, որ միջազգային հանրությունն իր ստանձնած պարտավորությունները կատարի Հայաստանի և Արցախի նկատմամբ, ապա Երևանը նույնպես պետք է լուրջ վերաբերվի իր պարտավորություններին։
Պուտինին ձերբակալելու հարցը, ըստ Հակոբ Բադալյանի, չի ձևավորվում հայ-ռուսական շրջանակներում, այլ հնչում է երրորդ կողմից, որին ո՛չ Հայաստանն է ուղիղ պատասխան տալիս, ո՛չ Ռուսաստանը։
Նշենք, որ 2022 թվականի մայիսին ԱԳ նախարար Արարատ Միրզոյանը հայտարարել էր, որ նախապատրաստվում է Պուտինի պաշտոնական այցը Հայաստան, բայց այն այդպես էլ տեղի չունեցավ։
Մանրամասները՝ տեսանյութում։
Նարեկ Կիրակոսյան
