07.10.2026 | 23:48
Արթուր Դանիելյանը կալանավորվեց
Ուկրաինան հայտնել է Սև ծովում ռուսական դեսանտային նավի ոչնչացման մասին
Քաղաքականություն
14.02.2024 | 16:26
Ուկրաինայի զինված ուժերը հայտարարել են, որ խորտակել են ՌԴ-ին պատկանող խոշոր դեսանտային «Կեսար Կունիկով» նավը։ Գլխավոր շտաբի տվյալներով՝ հարձակման պահին այն գտնվել է Ուկրաինայի տարածքային ջրերում՝ Ալուպկայի մոտ, գրում է currenttime.tv-ն։
«Ուկրաինսկայա պրավդան» առաջինն է հայտնել նավի խորտակման մասին՝ վկայակոչելով Գլխավոր հետախուզական վարչության աղբյուրին: Վերջինի խոսքով՝ նավի վրա հարձակվել են անօդաչու սարքերի միջոցով։ Խորտակման վայրից լուսանկար է հրապարակել «Крымский ветер» տելեգրամ ալիքը, որտեղ պայթյունի և փրկարար նավակների հետքեր են երևում։
«Два майора» տելեգրամ ալիքն էլ գրում է, որ հարձակումը տեղի է ունեցել Կացիվելի բնակավայրի մոտ՝ բռնակցված Ղրիմի հարավային ափին, և որ անձնակազմը ողջ է։
Ուկրաինական կողմի տվյալներով՝ «Կեսար Կունիկովը» երկրորդ անգամ է հարձակման ենթարկվում պատերազմի ժամանակ։ Այն առաջին անգամ հարվածի թիրախում է հայտնվել 2023 թվականի մարտի 24-ին, երբ ուկրաինական ռազմածովային ուժերը հրթիռային հարվածով շարքից հանել էին «Օրսկ» խոշոր դեսանտային նավը։
ՌԴ ՊՆ-ն դեռևս չի մեկնաբանել այս լուրը։ Ավելի վաղ ռուսական գերատեսչությունը հայտնել էր, որ Սև ծովի ավազանում 6 անօդաչու թռչող սարք են որսացել։
