12.01.2025 | 00:54
Կիևյան փողոցի տներից մեկում հրդեհ է բռնկվել. դեպքի վայր է մեկնել չորս մարտական հաշվարկ
Պուտինը միջնորդների միջոցով ԱՄՆ-ին առաջարկել է սառեցնել Ուկրաինայի հակամարտությունը. Reuters
Քաղաքականություն
14.02.2024 | 16:10
ՌԴ նախագահ Վլադիմիր Պուտինն ազդանշաններ է ուղարկել ԱՄՆ-ին Ուկրաինայում հրադադարի հնարավորությունը դիտարկելու պատրաստակամության մասին, սակայն նրա առաջարկը մերժվել է Վաշինգտոնի կողմից երկու կողմերի միջնորդների շփումներից հետո։ Այս մասին հայտնում է Reuters գործակալությունը՝ վկայակոչելով քննարկումներին ծանոթ երեք ռուսական աղբյուրների, փոխանցում է DW-ի ռուսական ծառայությունը։
Ըստ աղբյուրների՝ Կրեմլն առաջարկել է սառեցնել ռազմական գործողությունները ներկա շփման գծում՝ չցանկանալով զիջել տարածքներից որևէ մեկը, որոնց նկատմամբ ՌԴ-ն վերահսկողություն է հաստատել։
2023-ին Պուտինը հրապարակավ արտահայտել էր իր դիրքորոշումը, նաև այն փոխանցել մասնավոր միջնորդների միջոցով, այդ թվում՝ Մերձավոր Արևելքում Մոսկվայի արաբ գործընկերների։
«Ամերիկացիների հետ շփումները ոչ մի բանի չեն հանգեցրել»,- անանունության պայմանով Reuters-ին ասել է 2023 թվականի վերջին և 2024 թվականի սկզբին տեղի ունեցած քննարկումներին ծանոթ ռուսական բարձրաստիճան աղբյուրը:
Ռուսական մեկ այլ աղբյուրի համաձայն՝ ամերիկացիները միջնորդների միջոցով փոխանցել են, որ առանց Ուկրաինայի մասնակցության չեն քննարկելու հնարավոր զինադադարը, ուստի շփումներն ավարտվել են անհաջողությամբ։ Քննարկումներին ծանոթ երրորդ աղբյուրն էլ ասել է, որ «ամերիկացիների մոտ ամեն ինչ փլուզվել է», քանի որ Միացյալ Նահանգները չի ցանկացել ճնշում գործադրել Ուկրաինայի վրա։
Միևնույն ժամանակ, գործակալության աղբյուրն ԱՄՆ-ում հայտարարել է, որ Մոսկվայի և Վաշինգտոնի միջև պաշտոնական շփումներ չկան և ընդգծել, որ ԱՄՆ-ը չի մասնակցի Ռուսաստանի հետ բանակցություններին, որոնք շոշափում են Ուկրաինայի շահերը։
Ռուսական իշխանությունները չեն մեկնաբանել այս տեղեկությունը։
