Պաշտոնական Բաքուն արձագանքել է ՀՀ ԱԳՆ-ին

Ադրբեջանի ԱԳՆ-ն արձագանքել է Հայաստանի արտաքին քաղաքական գերատեսչության հայտարարությանը, որը վերաբերում էր Բաքվի իրականացրած հերթական ագրեսիային։ Ադրբեջանի ԱԳՆ-ն ՀՀ արտաքին գերատեսչության  որակումը, թե ադրբեջանական զինուժի ձեռնարկած միջոցները էսկալացիայի պատրվակ են, գնահատում է «բացարձակապես անհիմն»։

«Ռազմական սադրանքից հետո, որը հանգեցրել է ադրբեջանցի զինծառայողի վիրավորմանը, ադրբեջանական կողմը վերացրել է հայկական դիրքից բխող վտանգը, որը պատասխան գործողություն է եղել։ Ադրբեջանը հավատարիմ է խաղաղ գործընթացին և կոչ է անում հայկական կողմին ձեռնպահ մնալ ռազմական գործողություններից, որոնք կարող են վտանգի տակ դնել այդ ուղղությամբ ջանքերը»,-ասվում է հայտարարությունում, որով, փաստորեն, Բաքուն ևս մեկ անգամ ընդունում է իր իսկ կողմից ռազմական ագրեսիա իրականացնելու փաստը։

Հավելենք, որ ՀՀ ԱԳՆ-ն հայտարարել է, որ  սահմանային էսկալացիաներ ծավալելու համար Ադրբեջանը փնտրում է պատրվակներ:

«Փետրվարի 13-ի առավոտյան Հայաստանի Հանրապետության Սյունիքի մարզի, Կապան խոշորացված համայնքի Ներքին Հանդ բնակավայրի շրջանում Ադրբեջանի զինված ուժերի հերթական սադրանքի և ուժի կիրառման արդյունքում հայկական կողմն ունի 4 զոհ և մեկ վիրավոր: Չնայած ՀՀ իրավասու մարմինների` փետրվարի 12-ի հաղորդագրությանը, որը նույն օրն ադրբեջանական լրատվամիջոցների կողմից հրապարակված կադրերը և տեղեկությունները, թե Կապանի հատվածում ՀՀ դիրքապահներն ադրբեջանցի զինվորի են վիրավորել, հետաքննվում են, ադրբեջանական կողմը փետրվարի 13-ի առավոտյան ագրեսիվ գործողություններ է իրականացրել։ Սա ի ցույց է դնում, որ սահմանային էսկալացիաներ ծավալելու համար Ադրբեջանը փնտրում է պատրվակներ»,-ասվում է հայտարարության մեջ։

Էմմա Չոբանյան