15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
Ռուսական լրատվամիջոցները գրում են, թե Վլադիկավկազի բնակիչը ««Ջերմուկ»-ի շշից խմելիս կերակրափողի այրվածք է ստացել»
Տնտեսություն
13.02.2024 | 16:11
Ռուսական լրատվամիջոցները, վկայակոչելով Հյուսիսային Օսիայի ղեկավար Սերգեյ Մենյայլոին, գրում են, թե, իբր, Վլադիկավկազի բնակիչը կերակրափողի այրվածք է ստացել, երբ խմել է «Ջերմուկ» հանքային ջրի չբացված շշի պարունակությունը, որն ավելի ուշ պարզվել է՝ քացախ է։
«Այսօր տեղեկություն է հայտնվել, որ Վլադիկավկազի բնակիչը կերակրափողի այրվածք է ստացել այն բանից հետո, երբ մի կում է խմել «Ջերմուկ» հանքային ջրի շշից։ Ջրի փոխարեն փակ շշում եղել է քացախ։ Հանգամանքների պարզաբանմամը ներգրավված են Ներքին գործերի նախարարությունը, դատախազությունը և «Ռոսպոտրեբնադզորը»,- գրել է Մենյայլոն տելեգրամի իր ալիքում։
Նա ասել է,որ արդեն առգրավվել է «Ջերմուկ» հանքային ջրի 24 փաթեթ, և ներկայումս իրականացվում են անհրաժեշտ օպերատիվ միջոցառումներ։ Բացի այդ՝ «հանքային ջրի վաճառքով զբաղվող ձեռներեցներին խորհուրդ է տրվել դադարեցնել վաճառքը»։
«Դիմում եմ նաև հանրապետության բնակիչներին՝ քանի դեռ բոլոր հանգամանքները չեն պարզվել, մի օգտագործեք «Ջերմուկ» ապրանքանիշի արտադրանքը»,- հավելել է Մենյայլոն։
ՍԱՏՄ-ից (Սննդի անվտանգության տեսչական մարմին) Factor․am-ին հայտնեցին, որ ռուսական կողմից պաշտոնական ծանուցում չեն ստացել։ Տեսչության իրազեկման, խորհրդատվության և հանրության հետ տարվող աշխատանքների բաժնի պետ Անուշ Հարությունյանն ասաց․ «Գիտե՞ք, իրականում հոսքագծի մեջ չի կարող մեկ-երկուսի մեջ հանկարծ քացախ լցվել․ քացախ ընդհանրապես չի օգտագործվում «Ջերմուկ»-ի շշալցան պրոցեսում և նույնիսկ լվացման պրոցեսում չի օգտագործվում քացախ։
Կարող է այնտեղ (ՌԴ-ում) շշերը հավաքել են և փորձել են կեղծել․ ամեն դեպքում ռուսական կողմից որևէ պաշտոնական տեղեկատվություն չենք ստացել, եթե, իրոք, մեր արտադրանքի հետ խնդիր է լինում, իրենք ծանուցում են։ Եթե ստանանք պաշտոնական հաղորդագրություն շատ արագ կարձագանքենք»։
«Ջերմուկ Գրուպ» ընկերությունից այս պահի դրությամբ մեզ դեռևս չի հաջողվել խնդրի առնչությամբ մեկնաբանություն ստանալ։
