08.10.2026 | 10:15
Ռոնալդուն արձագանքել է Մեսիի հրաժեշտի խաղին. ԼՈՒՍԱՆԿԱՐ
ՌԴ-ն հետախուզում է հայտարարել Էստոնիայի վարչապետի և Բալթյան երկրների այլ պաշտոնյաների նկատմամբ
Քաղաքականություն
13.02.2024 | 18:24
Ռուսաստանի ներքին գործերի նախարարությունը հետախուզում է հայտարարել Էստոնիայի վարչապետ Կայա Կալլասի նկատմամբ։ Այս մասին հայտնում է Mediazona-ն՝ վկայակոչելով գերատեսչության որոնողական տվյալների բազան։
Կալլասին որոնում են քրեական հոդվածով, թեև ՌԴ քննչական մարմինները նրա դեմ գործ հարուցելու մասին տեղեկություն չեն հրապարակել։
Ռուսաստանում Կալլասի քրեական հետապնդման հավանական պատճառը կարող է լինել Էստոնիայում խորհրդային հուշարձանները քանդելու նախաձեռնությունը: 2022 թվականի նոյեմբերին Էստոնիայի պետական գրասենյակի խորհրդային հուշարձանների աշխատանքային խումբը խորհուրդ էր տվել քանդել կամ փոխարինել երկրում 322 խորհրդային հուշարձաններից 244-ը։
Այդ ժամանակ ՌԴ Քննչական կոմիտեի ղեկավար Ալեքսանդր Բաստրիկինը հանձնարարել էր ուսումնասիրել խորհրդային հուշարձանների քանդման Էստոնիայի ծրագրերը։
Կալլասից զատ՝ ՌԴ ՆԳՆ-ի կողմից հետախուզվողների բազայում կան Բալթյան երկրներից տասնյակ քաղաքական գործիչներ ու պաշտոնյաներ։
Մասնավորապես, Լատվիայի ՆԳՆ նախկին ղեկավար Մարիա Գոլուբևան, որն աջակցում էր 2022 թվականի մայիսին Ռիգայի Հաղթանակի զբոսայգում խորհրդային զինվորների հուշարձանի քանդմանը, ինչպես նաև Լատվիայի Սեյմի 68 պատգամավորներից 59-ը, որոնք կողմ են քվեարկել Ռուսաստանի հետ հուշահամալիրների պահպանման պայմանագրից դուրս գալուն։
