28.04.2026 | 14:43
Կա՞ հեղուկ գազի գնի բարձրացման ռիսկ․ պատասխանում է Էկոնոմիկայի նախարարությունը
Ադրբեջանի ՍԴ-ն վաղը կհաստատի ընտրություններում Ալիևի հաղթանակը
Քաղաքականություն
12.02.2024 | 13:40
Ադրբեջանի Կենտրոնական ընտրական հանձնաժողովն ամփոփել է փետրվարի 7-ին տեղի ունեցած արտահերթ նախագահական ընտրությունների արդյունքները, որոնց համաձայն՝ հաղթել է Իլհամ Ալիևը՝ հավաքելով ձայների 92,12 տոկոսը։
Ադրբեջանական լրատվամիջոցների հաղորդմամբ՝ նման որոշում է ընդունվել ԿԸՀ-ի նիստում, որտեղ քննարկվել են նախագահական ընտրությունների արդյունքների ամփոփման և ընտրությունների արդյունքների վերաբերյալ հանձնաժողովի արձանագրությունը համապատասխան փաստաթղթերով Սահմանադրական դատարան ներկայացնելու հարցեր։
Նշվել է, որ ընտրություններին ընտրողների մասնակցությունը կազմել է 76,43 տոկոս։
ԿԸՀ-ն որոշել է հաստատել արտահերթ նախագահական ընտրությունների արդյունքների արձանագրությունը և այն համապատասխան փաստաթղթերով ուղարկել Սահմանադրական դատարան։ Փետրվարի 13-ին էլ տեղի է ունենալու ԿԸՀ արձանագրությունը հաստատելու նպատակով Սահմանադրական դատարանի պլենումի նիստը։
«Սահմանադրական դատարանի պլենումի նիստը՝ 2024 թվականի փետրվարի 7-ին Ադրբեջանում կայացած արտահերթ նախագահական ընտրությունների արդյունքների վերաբերյալ ԿԸՀ արձանագրությունը հաստատելու հարցով, նշանակված է փետրվարի 13-ին՝ ժամը 11։00-ին»,- հայտնել են դատարանից։
Նշենք, որ Ադրբեջանում ընտրություների քվեարկությունն ուղեկցվում էր զանգվածային ընտրախախտումներով, որն արձանագրել են նաև ԵԱՀԿ/ԺՀՄԻԳ դիտորդական առաքելության ներկայացուցիչները։
Իլհամ Ալիևից զատ՝ ընտրություններին մասնակցում էր ևս 6 թեկնածու՝ Մեջլիսի պատգամավոր և Սոցիալական հետազոտությունների կենտրոնի խորհրդի նախագահ Զահիդ Օրուջը, պատգամավոր Ռազի Նուրուլլաևը, մեկ այլ պատգամավոր՝ «Համայն Ադրբեջանի ժողովրդական ճակատ» կուսակցության ղեկավար Գուդրաթ Հասանգուլիևը, «Մեծ արարում» կուսակցության ղեկավար և խորհրդարանի պատգամավոր Ֆազաիլ Մուստաֆան, Ադրբեջանի Լիբերալ-դեմոկրատական կուսակցության նախկին ղեկավար Ֆուադ Ալիևը, «Մեծ Ադրբեջան» կուսակցության նախագահ Էլշադ Մուսաևը, որոնք իրականում գործող իշխանությունների աջակիցներն են։
Էմմա Չոբանյան
