Մանվել Գրիգորյանին տրամադրվում է բուժօգնություն, ընդամենը, չմահանալու համար․ պաշտպան

Մանվել Գրիգորյանի պաշտպանները վճռաբեկ բողոք են ներկայացրել նրա նկատմամբ խափանման միջոց կալանավորումը փոխելու վերաբերյալ:

«Բողոքը ներկայացրել ենք, սակայն,  գրեթե,  վստահ եմ, որ Վճռաբեկ դատարանն այն վարույթ չի ընդունի և կմերժի, մեր Վճռաբեկ դատարանը ես լավ եմ ճանաչում»,-Factor.am-ի հետ զրույցում ասաց Մանվել Գրիգորյանի պաշտպան Արսեն Մկրտչյանը։

Վերջինս նշեց, որ Գրիգորյանի առողջական վիճակն օր օրի ավելի է վատանում։

Հարցին՝ ինչպիսի բժշկական օգնություն է նրան տրամադրվում, Արսեն Մկրտչանը պատասխանեց․

«Այնտեղ կա  70 անց մեկ բժիշկ, ով տրամադրում է բժշկական օգնություն, ընդամենը չմեռնելու համար՝ այսինքն Մանվել Գրիգորյանին տրամադրվում է բժշկական օգնություն ընդամենը չմահանալու համար։ Չկան համապատասխան դեղեր, բժշկական սարքավումներ և, հետևաբար, ավելին անել անհնար է։ Մանվել Գրիգորյանի մոտ ախտորոշված քաղցկեղի և շաքարային դիաբետի բուժման փուլերը չեն պահպանվել, ուստի վիճակը ծայրահեղ ծանր է»,-մեզ հետ զրույցում ասաց պաշտպանը։

Դիտարկմանը, եթե Վճռաբեկ դատարանը մերժի ներկայացված միջնորդությունը, ինչ քայլերի  են դիմելու, Արսեն Մկրտչյանը պատասխանեց․ «Պաշտպանական կողմը բավականին շատ տեղեկատվություն ունի։ Մեր ձեռքի տակ հարուստ գործիքակազմ  կա հետագա քայլերն իրականացնելու համար»։ 

Հիշեցնենք, որ Մանվել Գրիգորյանին մեղադրանք է առաջադրվել ՀՀ ՔՕ-ի 235-րդ հոդվածի 2-րդ մասի՝ ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը մի խումբ անձանց կողմից և ՔՕ-ի 179-րդ հոդվածի 3-րդ մասի 1-ին կետով՝ խոշոր չափերի յուրացում հատկանիշներով:

Նրա նկատմամբ խափանման միջոց է ընտրվել կալանավորումը:

Աղավնի Սուքիասյան