07.10.2026 | 09:45
Արտարժույթների փոխարժեքները՝ հոկտեմբերի 7-ի դրությամբ
Կիևը հայտարարում է, որ Բելգորոդում կործանված Իլ-76-ում ուկրաինացի ռազմագերիների չեն եղել
Քաղաքականություն
09.02.2024 | 16:14
Ուկրաինայի Ազգային անվտանգության և պաշտպանության խորհրդի քարտուղար Ալեքսեյ Դանիլովը հայտարարել է, որ ՌԴ-ում Բելգորոդի մերձակայքում կործանված Իլ-76 ինքնաթիռում ուկրաինացի ռազմագերիներ չեն եղել, փոխանցում է BBC-ի ռուսական ծառայությունը։
«Եղե՞լ են այնտեղ մեր ռազմագերիները, ձեզ հստակ կարող եմ ասել՝ ոչ»,- ասել է Դանիլովը «Բաբել» պարբերականին տված հարցազրույցում։
Նրա խոսքով՝ եթե ինքնաթիռում ռազմագերիներ լինեին, կործանման վայրում ավելի շատ «կենսաբանական նյութ» կլիներ։
Իլ-76 ինքնաթիռը կործանվել է հունվարի 24-ին Բելգորոդի շրջանում։ ՌԴ ՊՆ-ն հայտնել էր, որ օդանավում 65 ուկրաինացի ռազմագերիներ են եղել, որոնց տեղափոխում էին փոխանակման նպատակով։ Ռուսական կողմը պնդում է, որ Իլ-76-ի կործանման հետևում կանգնած են ուկրաինական ուժերը։
Ուկրաինական հետախուզությունը հաստատել էր, որ այդ օրը ռազմագերիների փոխանակում էր նախատեսվում, սակայն նաև նշել, որ չեն կարող ասել, թե ովքեր են եղել ինքնաթիռում։
Նախօրեին էլ ամերիկյան New York Times-ը, իր աղբյուրներին վկայակոչելով, հայտնել էր, որ Իլ-76-ն իսկապես խոցվել է ուկրաինական Patriot համակարգի կողմից, ինչպես պնդում են ռուսական իշխանությունները։ Աղբյուրները չեն հաստատել, որ ինքնաթիռում եղել են ուկրաինացի ռազմագերիներ, և ենթադրում են, որ օդանավում գտնվողների թիվը կարող է ավելի քիչ լինել, քան Ռուսաստանում քննարկվող 65 հոգին։
