Քաղաքականություն
09.02.2024 | 13:51
Փետրվարի 9-ի գիշերը ռուսական զորքերը գրոհային անօդաչու սարքերով հարձակվել են Ուկրաինայի տարածքի վրա։ Երկրի Զինված ուժերի ռազմաօդային ուժերի հրամանատարության տվյալներով, ընդհանուր առմամբ, արձակվել է 16 անօդաչու թռչող սարք, որոնցից 10-ը խոցվել են Նիկոլաևի, Խերսոնի և Խարկովի շրջաններում, գրում է Մեդուզան։
Խարկովի մարզում անօդաչու թռչող սարքի հարձակման հետևանքով վնասվել են Զմիևսկայա համայնքի քաղաքացիական ենթակառուցվածքները՝ հյուրանոց, մի քանի մասնավոր բնակելի շենքեր, հանգստի համալիր և ճաշարան, ասել է շրջանի ղեկավար Օլեգ Սինեգուբովը՝ հավելելով, որ անվտանգության աշխատակից է վիրավորվել։
Ռուսաստանի ՊՆ-ն իր հերթին հայտարարել է «Կիևի ռեժիմի կողմից ահաբեկչություն իրականացնելու փորձի մասին»՝ օգտագործելով անօդաչու թռչող սարքեր։
Ընդհանուր առմամբ, ռազմական գերատեսչության տարածած հաղորդագրության համաձայն, ոչնչացվել է 19 անօդաչու թռչող սարք․ երկուական՝ Կուրսկի և Կրասնոդարի երկրամասի, հինգը՝ Բրյանսկի, չորսը՝ Օրյոլի շրջանի և վեցը՝ Սև ծովի վրա։
Օրյոլի շրջանի իշխանությունները հայտարարել են, որ անօդաչու թռչող սարքի հարձակման թիրախը եղել են շրջանի վառելիքաէներգետիկ համալիրի օբյեկտները, գրում է ՌԻԱ Նովոստին։ Կրասնոդարի երկրամասում փետրվարի 9-ի գիշերը հրդեհ է տեղի ունեցել Իլսկի նավթավերամշակման գործարանում, որի պատճառը, ըստ ոչ պաշտոնապես հաստատված տվյալների, եղել է անօդաչու թռչող սարքի հարվածը։
