30.05.2026 | 10:27
ՌԴ-ն Կոպիրկինին կանչել է Մոսկվա՝ ՀՀ–ԵՄ մերձեցման պատճառով
ԱՄՆ-ն Բաքվին կոչ է արել կատարել իր պարտավորություններն ու ԵԱՀԿ/ԺՀՄԻԳ-ի հանձնարարականները
Քաղաքականություն
09.02.2024 | 12:58
Բաքվում ԱՄՆ դեսպանատունը հայտարարություն է տարածել Ադրբեջանում փետրվարի 7-ին անցկացված նախագահական ընտրությունների վերաբերյալ։
«Միացյալ Նահանգները կիսում է ԵԱՀԿ/ԺՀՄԻԳ դիտորդական առաքելության դիտարկումներն ու մտահոգություններն առ այն, որ փետրվարի 7-ի նախագահական ընտրությունները տեղի են ունեցել սահմանափակ միջավայրում՝ իսկական մրցակցության բացակայությամբ: Ադրբեջանն իր հավատարմությունն է հայտնել հիմնարար ազատություններին և ժողովրդավարական գործընթացներին իր սահմանադրությամբ և միջազգային պարտավորություններով»,- ասվում է հայտարարության մեջ։
ԱՄՆ-ն Բաքվին կոչ է արել կատարել այս պարտավորությունները և ԺՀՄԻԳ-ի նախորդ ու առաջիկա հանձնարարականները։
Նշենք, որ նախօրեին ԵԱՀԿ/ԺՀՄԻԳ դիտորդական առաքելության ներկայացուցիչները Բաքվում կայացած մամուլի ասուլիսում ներկայացրել էին ընտրությունների նախնական դիտարկումները։ Ըստ դիտորդների՝ արտահերթ նախագահական ընտրություններն անցել են սահմանափակ միջավայրում, և թեև ընտրությունների նախապատրաստական աշխատանքներն արդյունավետ կառավարվել են, սակայն դրանք աչքի են ընկել քաղաքական այլընտրանքների բացակայությամբ, լրջագույն ընտրախախտումներով։
«Ընտրությունների օրը դիտորդներն արձանագրել են լուրջ խախտումներ՝ հիմնականում քվեարկության գաղտնիության, բազմակի քվեարկության դեմ երաշխիքների բացակայության, քվեաթերթիկների լցոնումների և այլն։ Սա լուրջ հարցեր է առաջացրել քվեաթերթիկների հաշվարկի ամբողջականության վերաբերյալ»,- ասել էր ԵԱՀԿ ԽՎ պատվիրակության ղեկավար Դանիելա Դե Ռիդերը։
Ըստ Ադրբեջանի ԿԸՀ տվյալների՝ գործող նախագահ Իլհամ Ալիևն արտահերթ նախագահական ընտրություններում հավաքել է ձայների 92,12 տոկոսը՝ քվեաթերթիկների 100 տոկոսի մշակումից հետո։
Էմմա Չոբանյան
